રાજકોટના રૈયા ટેલિફોન એક્સચેન્જ પાસે આવેલા તુલશેશ્વર મહાદેવ મંદિરમાં દર્શન કરવા ગયેલા લોહાણા સમાજના એક યુવકને દર્શન કરવાની કથિત રીતે ના પાડવામાં આવતાં ભારે વિવાદ સર્જાયો છે. મંદિરના પૂજારી દ્વારા યુવકને મંદિરમાં પ્રવેશવા સામે રોકવામાં આવતાં મામલો ગરમાયો હતો. આ ઘટના દરમિયાન યુવકે પૂજારીનો વીડિયો ઉતારીને સોશિયલ મીડિયા પર વાયરલ કરી દેતાં આ સમગ્ર ઘટના વાયુવેગે પ્રસરી ગઈ હતી અને લોકોમાં ભારે ચર્ચા જાગી હતી.
લોહાણા સમાજના યુવાનોએ રેલી કાઢી નોંધાવ્યો સખત વિરોધ
પૂજારીનો વીડિયો વાયરલ થતાં જ લોહાણા સમાજમાં ભારે આક્રોશ વ્યાપી ગયો હતો. યુવક સાથે થયેલા અન્યાય અને દર્શન રોકવાના વિરોધમાં લોહાણા સમાજના મોટી સંખ્યામાં યુવાઓ એકઠા થઈ ગયા હતા. યુવાનોએ એકત્ર થઈને સખત વિરોધ દર્શાવવા માટે વિશાળ રેલી યોજી હતી. રેલી સ્વરૂપે પહોંચેલા યુવાનોએ પૂજારી સામે પોતાની નારાજગી વ્યક્ત કરી હતી અને ધાર્મિક સ્થળો પર દર્શન માટે સૌને સમાન અધિકાર મળવો જોઈએ તેવી માગ કરી હતી.