સુરત શહેરના ડુમસ રોડ પર આવેલી પ્રખ્યાત મહેશ્વરી વિદ્યાપીઠ શાળામાં આજે સવારથી જ ભારે અફરાતફરી અને ઉત્તેજનાનો માહોલ સર્જાયો હતો. શાળા તંત્રની મનમાની અને વાયદા ખિલાફીથી કંટાળેલા હજારો વાલીઓ એકઠા થઈને શાળા પરિસરમાં પહોંચી ગયા હતા અને તંત્ર વિરુદ્ધ જોરદાર હલ્લાબોલ કર્યો હતો. મોટી સંખ્યામાં વાલીઓ એકઠા થવાના કારણે શાળા કેમ્પસમાં ભારે હોબાળો મચી ગયો હતો અને પરિસ્થિતિ તંગ બની ગઈ હતી.
મોર્નિંગ શિફ્ટના વાયદાથી ફરી જતાં વાલીઓમાં ભારે રોષ
વાલીઓનો મુખ્ય આરોપ છે કે બાળકને એડમિશન આપતી વખતે શાળા સંચાલકો દ્વારા મોર્નિંગ શિફ્ટ (સવારની શિફ્ટ) આપવાની સ્પષ્ટ ખાતરી આપવામાં આવી હતી. પરંતુ હવે શાળા શરૂ થયા બાદ સંચાલકો પોતાના જ વાયદાથી ફરી ગયા છે અને વિદ્યાર્થીઓને અન્ય શિફ્ટમાં મોકલવા દબાણ કરી રહ્યા છે. વાલીઓનો દાવો છે કે શાળા સંચાલકો પોતાની મનમાની ચલાવી રહ્યા છે અને શિક્ષણના નામે વાલીઓની લાચારીનો ગેરલાભ ઉઠાવી રહ્યા છે.