Valsad: DRIની વધુ એક મોટી કાર્યવાહી, કલવાડા નજીક કોલ્ડ સ્ટોરેજમાંથી પ્રવાહી ડ્રગ્સનો જંગી જથ્થો જપ્ત

ગુજરાતમાં ડ્રગ્સ નેટવર્ક સામેની કાર્યવાહીમાં ડિરેક્ટોરેટ ઑફ રેવન્યુ ઇન્ટેલિજન્સ (DRI) ને વધુ એક મોટી સફળતા મળી છે. વલસાડના કલવાડા નજીક આવેલી એક ખાનગી વાડીમાં છુપાવેલા કોલ્ડ સ્ટોરેજ (Cold Storage) પર દરોડો પાડીને DRI એ મોટા પ્રમાણમાં પ્રવાહી ડ્રગ્સનો જથ્થો જપ્ત કર્યો છે.

વલસાડમાં કોલ્ડ સ્ટોરેજમાંથી ડ્રગ્સ ઝડપાયું

DRI દ્વારા કરવામાં આવેલી આ કાર્યવાહી તાજેતરમાં પકડાયેલા ડ્રગ્સના એક મોટા મામલાની વધુ તપાસના ભાગરૂપે કરવામાં આવી છે. DRI ની ટીમને ચોક્કસ બાતમી મળી હતી કે, ડ્રગ્સનો જંગી જથ્થો કલવાડા નજીકની એક ખાનગી વાડીના કોલ્ડ સ્ટોરેજમાં છુપાવવામાં આવ્યો છે. તાત્કાલિક કાર્યવાહી કરીને DRIની ટીમે કોલ્ડ સ્ટોરેજને ઘેરી લીધું હતું અને તપાસ શરૂ કરી હતી. તપાસ દરમિયાન, કોલ્ડ સ્ટોરેજમાંથી પ્રવાહી સ્વરૂપમાં રહેલા ડ્રગ્સનો જથ્થો મળી આવ્યો હતો, જેની કિંમત કરોડોમાં આંકવામાં આવી રહી છે.

કલવાડા નજીક DRIની વધુ એક કાર્યવાહી

પ્રાથમિક માહિતી મુજબ, વાડીના માલિકના એક મિત્ર દ્વારા આ કોલ્ડ સ્ટોરેજનો ઉપયોગ ગેરકાયદેસર પ્રવૃત્તિઓ માટે કરવામાં આવતો હતો. કોલ્ડ સ્ટોરેજની રખેવાળી કરનાર યુવકે પણ આ અંગે માહિતી આપી હતી.DRI એ ડ્રગ્સનો જથ્થો કબજે કરીને કોલ્ડ સ્ટોરેજને સીલ કરી દીધું છે અને વધુ તપાસ હાથ ધરી છે. આ મામલે ડ્રગ્સ ક્યાંથી આવ્યું, કોને સપ્લાય થવાનું હતું અને આંતરરાજ્ય કે આંતરરાષ્ટ્રીય સ્તરે જોડાયેલા રેકેટના મુખ્ય સૂત્રધારો કોણ છે, તે અંગે ઊંડાણપૂર્વક તપાસ ચાલી રહી છે. DRIની આ સફળ કાર્યવાહી દર્શાવે છે કે, ગુજરાતમાં ડ્રગ્સનું નેટવર્ક ઊંડે સુધી ફેલાયેલું છે અને આવનારા દિવસોમાં આ મામલે ડ્રગ્સના વધુ મોટા રેકેટ સામે આવે તેવી પ્રબળ શક્યતાઓ છે.