ડીસા શહેરમાં આજે માર્ગ સલામતી પર સવાલો ઉઠાવતી એક અત્યંત કરુણ અને કાળજું ધ્રુજાવી દેતી દુર્ઘટના ઘટી છે. ડીસાથી રાણપુર તરફ જતા વ્યસ્ત માર્ગ પર આજે એક અજાણ્યા જીપડાલા ના ચાલકે પોતાના વાહનને પૂરઝડપે અને ગફલતભરી રીતે ચલાવીને આગળ જઈ રહેલી એક એક્ટિવા સવાર યુવતીને પાછળથી જોરદાર ટક્કર મારી હતી. આ અકસ્માત એટલો સ્પીડમાં થયો હતો કે ટક્કર વાગતાની સાથે જ યુવતી એક્ટિવા પરથી હવામાં 20 ફૂટ જેટલી ફંગોળાઈને સીધી રોડની સાઈડમાં આવેલા એક કોલ્ડ સ્ટોરેજના લોખંડના સાઇન બોર્ડ સાથે ધડાકાભેર પટકાઈ હતી.
હિટ એન્ડ રનથી અરેરાટી
લોખંડના એંગલ અને બોર્ડ સાથે માથું ભટકાવવાના કારણે યુવતીને મગજના ભાગે આંતરિક અને ગંભીર હેમરેજ જેવી ઇજાઓ થઈ હતી, જેના કારણે હોસ્પિટલ પહોંચાડતા પહેલા જ તેણે ઘટનાસ્થળે જ દમ તોડી દીધો હતો. બીજી તરફ, અકસ્માત સર્જનાર અજાણ્યો જીપડાલા ચાલક માનવતા નેવે મૂકીને પોતાની ગાડી સાથે ત્યાંથી ફૂલ સ્પીડમાં નાસી છૂટ્યો હતો. અકસ્માત થતાં જ આસપાસના લોકો અને વાહનચાલકો મદદ માટે દોડી આવ્યા હતા, પરંતુ ત્યાં સુધીમાં મોડું થઈ ચૂક્યું હતું. ઘટનાની વિગત મળતા જ માલૂમ પડ્યું હતું કે મૃતક યુવતી ડીસા શહેરના એક અત્યંત પ્રતિષ્ઠિત અને અગ્રણી વેપારીની દીકરી છે. આ સમાચાર વાયુવેગે પ્રસરતા જ ડીસાના વેપારી મંડળો અને સ્નેહીજનોમાં ભારે શોક અને અરેરાટી વ્યાપી ગઈ છે.
