દિવાળીના પવિત્ર તહેવાર નિમિત્તે રાજ્યના પાટનગર ગાંધીનગર સ્થિત વિશ્વપ્રસિદ્ધ અક્ષરધામ મંદિર ખાતે ભવ્ય દીપોત્સવની ઉજવણીનું સુંદર આયોજન કરવામાં આવ્યું છે. અક્ષરધામ મંદિરમાં છેલ્લા 34 વર્ષથી પ્રકાશ પર્વની પરંપરાગત ઉજવણી કરવામાં આવે છે, જે અંતર્ગત આ વર્ષે પણ આગામી 8 નવેમ્બરથી 15 નવેમ્બર સુધી આકર્ષક દીપોત્સવ યોજાનાર છે, જેનાથી સમગ્ર મંદિર પરિસર દિવ્ય પ્રકાશથી મુગ્ધ કરી દે તેવું બની રહેશે.
10,000 દીવડાઓ અને વિશેષ આયોજનથી અલૌકિક નજારો
પ્રાપ્ત વિગતો અનુસાર, દિવાળી પર્વ નિમિત્તે અક્ષરધામ મંદિરને આશરે 10,000 દીવડાઓ તથા મનોહર રોશનીથી પ્રકાશિત કરવામાં આવશે. આગામી 8 દિવસ સુધી ચાલનાર આ ઉત્સવ દરમિયાન દેશ-વિદેશથી આવતા દર્શનાર્થીઓ સાંજની વેળાએ આ અલૌકિક નજારાનો લાભ લઈ શકશે. ગ્લો ગાર્ડન અને નીલકંઠ વાટિકામાં વિશેષ આયોજન કરવામાં આવ્યું છે, જે મુલાકાતીઓ માટે મુખ્ય આકર્ષણનું કેન્દ્ર બનશે.