ભારતની સૌથી લાંબી દરિયાઈ સીમા ધરાવતા ગુજરાત રાજ્યના દરિયા કિનારાની સુરક્ષાને વધુ સઘન અને અભેદ્ય બનાવવા માટે ગૃહ વિભાગ દ્વારા એક અત્યંત મહત્વપૂર્ણ નિર્ણય લેવામાં આવ્યો છે. દરિયાઈ સીમા પર ઘુસણખોરી અને ગેરકાયદે પ્રવૃત્તિઓ પર કડક નજર રાખવા માટે 'મરીન ટાસ્ક ફોર્સ'ને વધુ મજબૂત બનાવવામાં આવી છે.
મરીન ટાસ્ક ફોર્સનું નવું માળખું અને ઉચ્ચ અધિકારીઓની નિમણૂક
રાજ્ય સરકાર દ્વારા મરીન ટાસ્ક ફોર્સનું વિગતવાર માળખું આખરી કરવામાં આવ્યું છે. આ સુરક્ષા વ્યવસ્થાને સુચારુ રીતે ચલાવવા માટે ઉચ્ચ સ્તરીય અધિકારીઓની જગ્યાઓ મંજૂર કરવામાં આવી છે. આ નિર્ણય અંતર્ગત કુલ 3 SP (પોલીસ અધિક્ષક) અને 9 DySP (નાયબ પોલીસ અધિક્ષક) ની નવી જગ્યાઓ મંજૂર કરવામાં આવી છે, જેઓ દરિયાઈ વિસ્તારોમાં સુરક્ષાનું સીધું મોનિટરિંગ કરશે.
