ગાંધીનગર મહાનગરપાલિકા (GMC) દ્વારા પ્રજાના મહેનતની કમાણીના ટેક્સના નાણાંનો કઈ રીતે વેડફાટ થઈ રહ્યો છે તેનું ઉત્તમ ઉદાહરણ સેક્ટર 11માંથી સામે આવ્યું છે. અહીં તાજેતરમાં જ લાખો રૂપિયાના ખર્ચે અત્યંત મજબૂત અને નવો રોડ તૈયાર કરવામાં આવ્યો હતો. જોકે, આ નવો બનાવેલો રોડ હજુ તો યોગ્ય રીતે વપરાશમાં આવે તે પહેલાં જ GMC તંત્ર દ્વારા તેને ફરીથી આડેધડ ખોદી નાખવામાં આવ્યો છે. મનપાની આ આયોજન વગરની નીતિ-રીતિના કારણે પ્રજાના પૈસાનું પાણી થઈ રહ્યું હોવાના ગંભીર આક્ષેપો ઉઠી રહ્યા છે.
બ્યુટિફિકેશનના નામે તોડફોડ અને GMC તંત્રની લાલિયાવાડી
હદ તો ત્યારે થઈ જ્યારે જાણવા મળ્યું કે આ સારો અને ઉપયોગી રોડ માત્ર ‘બ્યુટિફિકેશન’ના નામે તોડી પાડવામાં આવ્યો છે. જો આ રોડ પર બ્યુટિફિકેશનનું આયોજન અગાઉથી જ નક્કી હતું, તો પછી નવો રોડ બનાવવાનો મોટો ખર્ચ શા માટે કરવામાં આવ્યો? તેવા તીખા પ્રશ્નો હવે ચર્ચાની એરણે ચડ્યા છે. એક તરફ શહેરીજનો પ્રાથમિક સુવિધાઓ માટે ઝંખી રહ્યા છે, ત્યારે બીજી તરફ મનપાના અધિકારીઓ અને કોન્ટ્રાક્ટરો વચ્ચેના તાલમેલના અભાવે ચાલી રહેલી આ લાલિયાવાડી સામે સ્થાનિકોમાં ભારે રોષ જોવા મળી રહ્યો છે.