આગામી નવરાત્રીના પવિત્ર તહેવારને ધ્યાને રાખીને ગાંધીનગર મહાનગરપાલિકાના ફૂડ વિભાગ દ્વારા ખેલૈયાઓની આરોગ્ય સુરક્ષા માટે મોટો નિર્ણય લેવાયો છે. ગાંધીનગર મનપાની ફૂડ સેફ્ટી ટીમ દ્વારા નવરાત્રી દરમિયાન શહેરના તમામ મોટા ગરબા સ્થળો, પાર્ટી પ્લોટ અને જાહેર મેદાનોમાં ઉભા કરાતા ફૂડ સ્ટોલ્સની સઘન તપાસ હાથ ધરવામાં આવશે. ફૂડ સેફ્ટી ઓફિસર્સની ખાસ ટીમો નવરાત્રીના તમામ દિવસો દરમિયાન સતત સરપ્રાઈઝ ચેકિંગ હાથ ધરશે, જેથી ખાદ્યચીજોની ગુણવત્તા અને સ્વચ્છતાની યોગ્ય ચકાસણી કરી શકાય.
કૃત્રિમ રંગોના ઉપયોગ પર પ્રતિબંધ
ફૂડ વિભાગ દ્વારા તમામ ખાણી-પીણીના વેપારીઓ અને ગરબા આયોજકોને ‘ફૂડ સેફ્ટી એન્ડ સ્ટાન્ડર્ડ્સ એક્ટ 2006’ ની જોગવાઈઓનું અક્ષરશઃ પાલન કરવા કડક સૂચના આપવામાં આવી છે. ખાદ્યચીજો તૈયાર કરતી વખતે હાનિકારક કૃત્રિમ રંગોનો ઉપયોગ ન કરવા અને સ્વાસ્થ્ય માટે હાનિકારક એવા અખબારના કાગળ (છાપા) માં ખોરાક ન પીરસવા ખાસ તાકીદ કરવામાં આવી છે. આ ઉપરાંત, રાંધવામાં વપરાતા તેલ અને સ્વચ્છતાના ધોરણોની પણ કડક તપાસ કરવામાં આવશે.