Gandhinagar: ગાંધીનગર અને દહેગામમાં તોફાની પવન સાથે એક ઈંચ વરસાદ વરસ્યો

ગાંધીનગરમાં ગઈકાલે રાત્રે તોફાની પવન સાથે ધોધમાર વરસાદ ખાબક્યો હતો. જિલ્લાના ચારેય તાલુકામાં મેઘમહેર થઈ હતી.

જેમાં દહેગામ પંથકમાં એક ઈંચથી વધુ, ગાંધીનગરમાં એક ઈંચ વરસાદ જ્યારે કલોલ તથા માણસા પંથકમાં પોણા ઈંચ જેટલો વરસાદ પડયો હતો. જ્યારે ગાંધીનગર શહેરમાં સરેરાશ દોઢ ઈંચ જેટલો વરસાદ પડયો હતો. જિલ્લામાં ગઈકાલે રાત્રે 19.75 એમએમ એટલે કે પોણા ઈંચથી વધુ વરસાદ નોંધાયો હતો. આજે દિવસ દરમિયાન દહેગામ પંથક સિવાય ક્યાય નોંધપાત્ર વરસાદ પડયો નથી. હવામાન વિભાગની ભારે વરસાદની આગાહી બાદ રાજ્યના મોટાભાગના વિસ્તારોમાં રાત્રે વરસાદ પડયો હતો. ગાંધીનગરમાં પણ ગઈકાલે રાત્રે 9 વાગ્યા બાદ ભારે પવન ફૂંકાયો હતો.

મીની વાવાઝોડાની સ્થિતિ વચ્ચે ધોધમાર વરસાદ તૂટી પડયો હતો. થોડા સમય માટે પડેલાં વરસાદને પગલે નિચાણવાળા વિસ્તારોમાં પાણી ભરાઈ ગયા હતા. અચાનક પડેલાં વરસાદને પગલે કામથી બહાર નીકળેલા અને તથા ઘરે પરત ફરતાં અનેક લોકોને મુશ્કેલી પડી હતી. એકંદરે ગઈકાલે ગાંધીનગર શહેરમાં 32 એમએમ, ગાંધીનગર તાલુકામાં 21 એમએમ, કલોલ તાલુકામાં 15 એમએમ, માણસા તાલુકામાં 14 એમએમ, જ્યારે દહેગામ તાલુકામાં 29 એમએમ વરસાદ ખાબકી ગયો હતો. જોકે રાત્રે 12 વાગ્યા બાદ અને આજે આખો દિવસ દહેગામ સિવાય ક્યાય નોંધપાત્ર વરસાદ પડયો નથી. આજે સવારે છ વાગ્યા સુધીમાં જિલ્લામાં સિઝનનો 74.80 ટકા વરસાદ નોંધાયો છે.