સામાન્યતઃ સપ્ટેમ્બરમાં વિધાનસભાનું સત્ર મળ્યા બાદ ઈશુના નવા વર્ષમાં ફેબ્રુઆરીમાં નવા નાણાકીય વર્ષ માટે બજેટ સત્ર મળતુ હોય છે. પરંતુ, મંત્રીમંડળના વિસ્તરણ- ફેરફાર પછી હવે પહેલીવાર ગુજરાત સરકાર ગુજરાતી નૂતનવર્ષારંભે જ વિધાનસભાનું ખાસ સત્ર યોજવા માટે તૈયારીઓ કરી રહી છે. ટોચના અધિકારીઓના કહેવા મુજબ રાજ્ય સરકાર યુનિફોર્મ સિવિલ કોડ- UCCના મુસદ્દાને આખરી ઓપ આપી રહી છે. આગામી 50 દિવસમાં વિધાનસભામાં ખાસ સત્ર યોજીને આ મુસદ્દાને કાયદાકીય સ્વરૂપ આપશે. તેની સાથે જ દેશમાં UCC અમલ માટે ઉત્તરખંડ બાદ ગુજરાત બીજુ રાજ્ય બની રહેશે.
ગુજરાત સરકારે રાજ્યમાં UCCના અમલની શક્યતાઓ ચકાસવા માટે સુપ્રિમ કોર્ટના નિવૃત ન્યાયધિશ રંજના દેસાઈની અધ્યક્ષતામાં પાંચ સભ્યોની કમિટી રચી હતી. કમિટીએ રાજ્યમાં અન્ય કાયદાઓ દ્વારા વિશેષાધિકાર ધરાવતા ધર્મ અને વંશીય (આદિજાતી) સહિતના જુથોના આગેવાનો સાથે બેઠકો યોજી હતી. જેમાં કમિટીને 1.15 લાખ જેટલી રજૂઆતો મળી છે. આ રજૂઆતોને આધારે ગુજરાતમાં તમામ નાગરીકો માટે એક સમાન કાયદાનો અમલ કરાવવા અંગેની શક્યતા અંગે અહેવાલ તૈયાર કર્યો છે. ઓગસ્ટ મહિનામાં જસ્ટિસ રંજના દેસાઈ અને કમિટીએ મુખ્યમંત્રી ભૂપેન્દ્ર પટેલ સાથે બેઠક યોજીને પ્રેઝન્ટેશન કર્યુ હતુ ત્યારે જ આ કાયદા માટે વિધાનસભામાં રજૂ કરવાનો મુસદ્દો તૈયાર કરવા માટેનો નિર્દેશ કાયદા વિભાગને મળ્યો હતો. આથી, ગુજરાત સરકાર ફેબ્રુઆરી- 2026માં બજેટ રજૂ કરે તે પહેલા UCC એક્ટના મુસદ્દા- વિધેયકને વિધાનસભામાં રજૂ કરી, તેને મંજૂર કરાવવા માટે નવેમ્બર કે ડિસેમ્બરમાં ખાસ સત્ર બોલાવશે તેવી શક્યતા વ્યક્ત કરાય છે. ઉલ્લેખનિય છે કે, એક કે બે દિવસના આ સત્રમાં UCC ઉપરાંત સરકાર દ્વારા જમીન, શ્રમિકો, ઉદ્યોગોને સ્પર્શતા કાયદામાં સુધારાઓ સુચવતા અન્ય વિધેયકો પણ રજૂ કરી શકે તેમ છે.
