ગાંધીનગર મહાનગરપાલિકામાં મેયર અને અન્ય પદાધિકારીઓની વરણીને લઈને રાજકીય વાતાવરણ ગરમાયું છે. આગામી સમયમાં નવા નેતૃત્વની પસંદગી માટે પ્રક્રિયાઓ તેજ થઈ ગઈ છે, જેને લઈને ભાજપ દ્વારા ખાસ આયોજન કરવામાં આવ્યું છે.
22 ઓક્ટોબરના રોજ ગાંધીનગર મનપાના મેયર સહિતના પદાધિકારીઓની પસંદગી માટે મહત્વપૂર્ણ સેન્સ પ્રક્રિયા હાથ ધરવામાં આવશે. બપોરે 2 વાગ્યા બાદ તમામ ચૂંટાયેલા કોર્પોરેટરો પાસેથી સેન્સ લેવામાં આવશે, જેમાં દરેકના મત અને અભિપ્રાય જાણવામાં આવશે.
આ પ્રક્રિયા માત્ર કોર્પોરેટરો પૂરતી મર્યાદિત નથી, પરંતુ પક્ષના સંગઠનને મજબૂત બનાવવા અને સૌની સંમતિ સાધવા માટે સંગઠનના અગ્રણી હોદ્દેદારો સાથે પણ વિશેષ મુલાકાત અને ચર્ચાઓ કરવામાં આવશે.
આ સમગ્ર પ્રક્રિયાને પારદર્શક અને સુચારૂ રૂપે પાર પાડવા માટે પ્રદેશ ભાજપ દ્વારા ખાસ નિરીક્ષકોની નિમણૂક કરવામાં આવી છે. પ્રદેશ ભાજપના 3 આગેવાનો નિરીક્ષક તરીકે ગાંધીનગર આવીને આ સેન્સ પ્રક્રિયા હાથ ધરશે.
મળતી માહિતી મુજબ, આ સેન્સ પ્રક્રિયા બાદ ટૂંક સમયમાં જ નામની જાહેરાત થઈ શકે છે. આગામી 30 ઓક્ટોબર પહેલા ગાંધીનગર મનપામાં નવા મેયરની સત્તાવાર વરણી થઈ જાય તેવી પ્રબળ સંભાવના છે.
ગાંધીનગર મનપાનું આ મેયર પદ ખાસ ઓબીસી અનામત હેઠળ ફાળવવામાં આવ્યું છે. આ અનામત બેઠક પર કયા નવા ચહેરાને તક મળે છે, અને કોના માથા પર તાજ સજે છે, તેના પર સૌની નજર ટકેલી છે.
આ પણ વાંચો: Gandhinagar News: તલાટી અને નાયબ મામલતદારોની દિવાળી બગડશે, ગ્રામ પંચાયતોમાં ચૂંટણીની તૈયારી શરૂ