ગુજરાતને વૈશ્વિક સ્તરે રોકાણ માટેનું સૌથી આકર્ષક રાજ્ય બનાવવાના મક્કમ નિર્ધાર સાથે મુખ્યમંત્રી દ્વારા રાજ્યની 'નવી ઔદ્યોગિક પોલિસી 2026' ની જાહેરાત કરવામાં આવી છે. આ નવી નીતિને 'વિકસિત ભારત 2047' ના વિઝનને સાકાર કરનારી ગણાવતા મુખ્યમંત્રીએ જણાવ્યું હતું કે, આ પોલિસી રોકાણો આકર્ષવા પૂરતી સીમિત નથી, પરંતુ રાજ્યના દરેક ઉદ્યોગોને પ્રોત્સાહન પૂરું પાડે તે રીતે તૈયાર કરવામાં આવી છે. ઉદ્યોગ જગત તરફથી મળેલી તમામ માંગણીઓનો સ્વીકાર કરીને જ આ નીતિ ઘડવામાં આવી છે, જે અન્ય રાજ્યોના ઉદ્યોગોને પણ ગુજરાત તરફ આકર્ષિત કરશે.
વડાપ્રધાનના સુશાસનને અભિનંદન અને ‘રેડ કાર્પેટ’ અભિગમ
નવી નીતિની જાહેરાત કરતાં મુખ્યમંત્રીએ વડાપ્રધાનના સફળ સુશાસનના 12 વર્ષ પૂર્ણ થવા બદલ ગૌરવભેર અભિનંદન પાઠવ્યા હતા. તેમણે ઉમેર્યું કે વડાપ્રધાનના 12 વર્ષનો આ સમયગાળો દેશ અને રાજ્ય માટે સામાજિક, આર્થિક અને ઔદ્યોગિક ક્ષેત્રે નવા શિખરો સર કરનારો સાબિત થયો છે. વડાપ્રધાને ઉદ્યોગો માટે રેડ ટેપીઝમ નાબૂદ કરી 'રેડ કાર્પેટ' ની સુવિધા આપી છે. જેના કારણે આજે ગુજરાત મેન્યુફેક્ચરિંગ અને ઇન્ફ્રાસ્ટ્રક્ચર ક્ષેત્રે સમગ્ર દેશમાં અગ્રેસર છે.
