રાજ્યમાં છેલ્લા કેટલાક દિવસોથી સવારના સમયે ઠંડા પવનો ફૂંકાઈ રહ્યા છે, જેના કારણે વહેલી સવારે ઠંડીનો ચમકારો અનુભવાઈ રહ્યો છે. હવામાનની આગાહી મુજબ, હવે આગામી દિવસોમાં રાજ્યના વાતાવરણમાં મોટા ફેરફાર જોવા મળી શકે છે. હવામાન નિષ્ણાતોની આગાહી મુજબ, હાલ સવારે ઠંડા પવનો ફૂંકાશે, પરંતુ તારીખ ૧૪ નવેમ્બર બાદ લઘુતમ તાપમાનમાં નજીવો વધારો થવાની શક્યતા રહેશે, જેના કારણે ઠંડીનું પ્રમાણ થોડું ઘટી શકે છે. જોકે, ડિસેમ્બર મહિનાની શરૂઆતથી ફરીથી ઠંડા પવનો ફૂંકાવાનું શરૂ થશે અને ધીરે ધીરે શિયાળાની આકરી શરૂઆત થશે.
આકરી ઠંડી અને માવઠાની શક્યતા
હવામાનના આંકલન મુજબ, ગુજરાતમાં 22મી ડિસેમ્બરથી આકરી ઠંડી પડવાની શક્યતા છે. આ સમયગાળા દરમિયાન રાજ્યભરમાં ઠંડીનો જોરદાર અનુભવ થઈ શકે છે. આ ઉપરાંત, ડિસેમ્બર મહિનામાં માવઠું (કમોસમી વરસાદ) થવાની શક્યતા પણ રહેલી છે, જેની અસર દક્ષિણ ગુજરાતના ભાગોમાં, મધ્ય અને ઉત્તર ગુજરાતના કેટલાક ભાગોમાં તથા રાજ્યના છૂટાછવાયા વિસ્તારોમાં થવાની શક્યતા રહેશે.
