ગુજરાત રાજ્યમાં યોજાયેલી નગરપાલિકા, મહાનગરપાલિકા અને પંચાયતની ચૂંટણીઓના પરિણામો આજે જાહેર થયા છે. આ પરિણામોમાં સત્તાધારી પક્ષ ભાજપે રાજ્યના મોટાભાગના વિસ્તારોમાં પોતાનું વર્ચસ્વ જાળવી રાખ્યું છે, જોકે પાટણ અને બોટાદના ગ્રામીણ વિસ્તારોમાં કોંગ્રેસે ભાજપને જોરદાર લડત આપીને સત્તાના સમીકરણો બદલી નાખ્યા છે.
પાટણ: સિદ્ધપુરમાં ભાજપ અને તાલુકામાં કોંગ્રેસનું રાજ
પાટણ જિલ્લાના પરિણામોમાં મિશ્ર પ્રતિસાદ જોવા મળ્યો છે. સિદ્ધપુર નગરપાલિકાની ૩૬ બેઠકોમાંથી ૨૬ બેઠકો પર વિજય મેળવી ભાજપે ભગવો લહેરાવ્યો છે, જ્યારે કોંગ્રેસને ૦૬ અને અપક્ષને ૦૪ બેઠકો મળી છે. જોકે, પાટણ તાલુકા પંચાયતમાં મોટો ઉલટફેર થયો છે. અહીં ભાજપના શાસનને ઉથલાવી કોંગ્રેસે ૨૦ માંથી ૧૩ બેઠકો જીતીને પંચાયત પર પોતાનો કબજો જમાવ્યો છે.
વાપી અને નડિયાદ: મહાનગરપાલિકામાં ભાજપનો દબદબો
વાપી મહાનગરપાલિકામાં ભાજપે સ્પષ્ટ બહુમતી સાથે ભવ્ય વિજય મેળવ્યો છે. નાણા મંત્રી કનુભાઈ દેસાઈએ આ જીતને વડાપ્રધાન નરેન્દ્ર મોદીની વિકાસયાત્રા પર લોકોનો અતૂટ વિશ્વાસ ગણાવ્યો છે. બીજી તરફ, નડિયાદ મહાનગરપાલિકામાં ભાજપે ૪૨ બેઠકો જીતીને વિરોધ પક્ષોને પરાસ્ત કર્યા છે. જોકે, અહીં વોર્ડ નંબર ૧૨ માં ભાજપ માટે આંચકાજનક પરિણામ આવ્યું છે, જ્યાં સ્થાનિક ધારાસભ્ય પંકજભાઈ દેસાઈના પિતરાઈ ભાઈ હેમલ પટેલની હાર થઈ છે અને કોંગ્રેસ શહેર પ્રમુખ હાર્દિક ભટ્ટ વિજેતા બન્યા છે.
સૌરાષ્ટ્ર અને દક્ષિણ ગુજરાતના પરિણામો
પોરબંદર: જિલ્લા પંચાયતની ૧૮ માંથી ૧૮ બેઠકો જીતીને ભાજપે વિપક્ષના સૂપડા સાફ કરી નાખ્યા છે.
સુરત: સુરત જિલ્લા પંચાયત પર ભાજપે ૩૧ બેઠકો સાથે કબજો જાળવી રાખ્યો છે, જ્યારે કોંગ્રેસનું ખાતું પણ ખુલ્યું નથી. માંડવી તાલુકા પંચાયતમાં પણ ભાજપ ૦૬ બેઠકો સાથે આગળ છે.
બોટાદ: ગઢડા તાલુકા પંચાયતમાં ભાજપ અને કોંગ્રેસ વચ્ચે ખરાખરીનો જંગ જામ્યો છે. ઢસા જંક્શન અને ટાટમ બેઠક પર કોંગ્રેસના મહિલા ઉમેદવારો વિજયી બન્યા છે.
મધ્ય ગુજરાત: ભરૂચ અને બોડેલી
ભરૂચ નગરપાલિકાની ૪૪ બેઠકોમાંથી ભાજપે ૨૫ બેઠકો મેળવી બહુમતી હાંસલ કરી છે. જ્યારે છોટાઉદેપુરની બોડેલી નગરપાલિકામાં ભાજપના ૨૬ ઉમેદવારો જીત્યા છે, જેને પગલે છેલ્લા ઘણા સમયથી ચાલતા ભાજપના વર્ચસ્વ પર મહોર લાગી છે.
આ પણ વાંચોઃ Gujarat Local Body Election Results 2026: ભાખર મોટીમાં ભાજપનો વિજયધ્વજ, રાજપીપળામાં વિપક્ષોના સૂપડા સાફ
