ગુજરાતના જૂનાગઢ (Junagadh) શહેરમાંથી એક અત્યંત કરુણ અને કાળજુ કંપાવી દે તેવી ઘટના સામે આવી છે. શહેરના GIDC વિસ્તારમાં બનેલા આ બનાવમાં ૩ વર્ષની માસૂમ બાળકીનું પોતાના જ પિતાના વાહન નીચે આવી જવાથી ઘટનાસ્થળે જ કમકમાટીભર્યું મોત નીપજ્યું છે. પ્રાથમિક વિગતો મુજબ, વાહનની આગળના ભાગમાં રમી રહેલી આ માસૂમ દીકરીની હાજરીથી અજાણ રહીને કચરો ભરેલો બોલેરો (Bolero) આગળ ચલાવવામાં આવતા આ જીવલેણ અકસ્માત સર્જાયો હતો. પોતાની જ વ્હાલસોયી દીકરીના આ પ્રકારના કરુણ મોતથી પરિવારજનો પર આભ તૂટી પડ્યું છે અને સમગ્ર વિસ્તારમાં ભારે શોક છવાઈ ગયો છે.
સમગ્ર કરુણ ઘટના CCTV ફૂટેજમાં કેદ
આ અત્યંત દુઃખદ અકસ્માતની સમગ્ર ઘટના નજીકમાં લાગેલા CCTV કેમેરામાં કેદ થઈ ગઈ છે, જે જોઈને સૌ કોઈ સ્તબ્ધ બની ગયા છે. વાહન આગળ રમતી બાળકી અચાનક ટાયર નીચે આવી જતાં ઘટનાસ્થળે ભારે અફરાતફરી અને શોકનો માહોલ સર્જાયો હતો. સ્થાનિક લોકો અને પરિવારજનો તાત્કાલિક દોડી આવ્યા હતા, પરંતુ માસૂમ બાળકીએ ઘટનાસ્થળે જ દમ તોડી દીધો હતો. આ ઘટનાએ વાલીઓ અને વાહનચાલકોને નાના બાળકોની આસપાસ વાહન હંકારતી વખતે અત્યંત સાવચેતી રાખવાની ગંભીર ચેતવણી આપી છે.
