ગુજરાતમાં હાલમાં થયેલા કમોસમી વરસાદ (માવઠા)ને કારણે ખેડૂતોના ઊભા પાકને વ્યાપક નુકસાન થયું છે, જેના કારણે ધરતીપુત્રોના ચહેરા પર ચિંતાની લહેર છવાઈ ગઈ છે. ખેડૂતોની આ દયનીય હાલત જોઈને હવે સાધુ સમાજ તેમની વ્હારે આવ્યો છે અને રાજ્ય સરકાર સમક્ષ તાત્કાલિક રાહત પેકેજ જાહેર કરવાની માંગ કરી છે.
મહંત સુખરામદાસ બાપુનું ધારદાર નિવેદન
જૂનાગઢના મેંદરડા સ્થિત ખાખી મઢીના મહંત સુખરામદાસ બાપુએ ખેડૂતોના સમર્થનમાં એક સણસણતું નિવેદન આપ્યું છે. તેમણે સ્પષ્ટપણે જણાવ્યું છે કે, "રાજ્ય સરકારે ઉદ્યોગપતિઓને સાચવવા કરતા ખેડૂતોની ચિંતા કરવી જોઈએ." બાપુએ ભારપૂર્વક કહ્યું કે ખેડૂત એ જગતનો અન્નદાતા છે અને તેની અવગણના ન થવી જોઈએ. મહંત સુખરામદાસ બાપુએ કહ્યું કે, "ઉદ્યોગપતિઓ કદાચ ધન આપી શકશે, પરંતુ જગતનું પેટ ભરવા માટે અનાજ તો માત્ર ખેડૂત જ આપશે." કમોસમી વરસાદના કારણે ખેડૂતોનો પાક સંપૂર્ણ રીતે નાશ પામ્યો હોવાની વાત જણાવીને તેમણે ખેડૂતોની વર્તમાન હાલતને 'દયનીય' ગણાવી હતી.
તાત્કાલિક આર્થિક પેકેજની માંગ
સાધુ-સંતોએ રાજ્ય સરકાર સમક્ષ એક જ મુખ્ય માંગ મૂકી છે કે, ખેડૂતોને થયેલા આ ભારે નુકસાન બદલ તાત્કાલિક આર્થિક પેકેજ જાહેર કરવામાં આવે. મહંત સુખરામદાસ બાપુએ રાજ્ય સરકારને પ્રાર્થના કરતા કહ્યું કે, ખેડૂતોનું વિચારીને વહેલી તકે યોગ્ય રાહત પેકેજ જાહેર થાય, જેથી ધરતીપુત્રોને આ આફતમાંથી ઊગરી શકાય.ખેડૂતો પણ હવે સરકાર સામે યોગ્ય સહાયની માંગ કરી રહ્યા છે. તેમનું કહેવું છે કે, માવઠાના કારણે તેમના ખેતરોમાં મોટો પાક ધોવાઈ ગયો છે, જેનાથી તેમને આર્થિક રીતે મોટો ફટકો પડ્યો છે. આવા સમયે સરકારી સહાય જ તેમને ફરીથી બેઠા થવામાં મદદરૂપ થઈ શકે છે.
ખેડૂતોના ઊભા પાકને વ્યાપક નુકસાન
સમગ્ર ગુજરાતમાં ખેડૂતોની વ્યથા વચ્ચે, જૂનાગઢના મહંત સુખરામદાસ બાપુના આ નિવેદને સાધુ સમાજની સંવેદનશીલતા અને ખેડૂતો પ્રત્યેની તેમની ચિંતાને ઉજાગર કરી છે. ખેડૂતો માટે સહાય મુદ્દે હવે સાધુ-સંતોના મેદાનમાં આવવાથી, સરકાર પર તાત્કાલિક યોગ્ય નિર્ણય લેવાનું દબાણ વધ્યું છે. રાજ્ય સરકાર આ 'અન્નદાતા'ની આર્થિક કટોકટીમાં કેટલી ઝડપથી અને કેટલી મોટી સહાય જાહેર કરે છે, તે જોવું રહ્યું.
