મહેસાણા જિલ્લાના ખેરાલુ તાલુકામાં આવેલા ટીંબા કવોરી બસ સ્ટેન્ડ નજીક એક ગમખ્વાર માર્ગ અકસ્માત સર્જાતા બે યુવાનોના કરુણ મોત નિપજ્યા છે. બાઇક અને કાર વચ્ચે જોરદાર ટક્કર થતાં આ અકસ્માત બન્યો હતો. જેને પગલે સમગ્ર વિસ્તારમાં શોકનું મોજું ફરી વળ્યું છે. આ દુર્ઘટના ખેરાલુ-સતલાસણા હાઈવે પર બની હતી. એક બાઇક પર સવાર બે યુવાનો પસાર થઈ રહ્યા હતા ત્યારે સામેથી આવતી એક કાર સાથે તેમનો ભયંકર અકસ્માત થયો હતો.
ટીમ્બા કવોરી બસ સ્ટેન્ડ નજીક સર્જાયો અકસ્માત
ટક્કર એટલી જોરદાર હતી કે બાઇક સવાર બંને યુવકો ગંભીર રીતે ઇજાગ્રસ્ત થયા અને ઘટનાસ્થળે જ તેમના શ્વાસ થંભી ગયા હતા. આ અકસ્માતનો અવાજ સાંભળીને આસપાસના લોકો તાત્કાલિક ઘટનાસ્થળે દોડી આવ્યા હતા. લોકોએ તાત્કાલિક પોલીસને જાણ કરી હતી. સતલાસણા પોલીસનો સ્ટાફ ઘટનાસ્થળે પહોંચી ગયો હતો અને મૃતદેહોને પોસ્ટમોર્ટમ માટે હોસ્પિટલ ખસેડવાની કાર્યવાહી હાથ ધરી હતી. પોલીસે અકસ્માતગ્રસ્ત વાહનોને કબજે લઈ આગળની તપાસ શરૂ કરી છે.
