મહીસાગર પોલીસ અધિક્ષક જયદીપસિંહ જાડેજાના વાહનને દોરડા વડે ખેંચી ભાવભરી વિદાય અપાઈ મહીસાગર જિલ્લાના પોલીસ અધિક્ષક તરીકે ફરજ બજાવનાર જયદીપસિંહ જાડેજાની બદલી થતાં તેમને મહીસાગર પોલીસ અધિક્ષક કચેરી ખાતે ભવ્ય અને ભાવુક વિદાય આપવામાં આવી હતી. તેમની બદલી ગીર-સોમનાથ જિલ્લાના પોલીસ અધિક્ષક તરીકે થઈ છે. કચેરી ખાતે વિદાય વેળાએ લાગણીસભર માહોલ સર્જાયો હતો.
આ પ્રસંગે ડીવાયએસપી જે જી ચાવડા, કમલેશ વસાવા સહિત પોલીસ અધિકારીઓ અને કર્મચારીઓએ તેમના વાહનને દોરડા વડે ખેંચીને તેમને વિદાય આપી હતી. આ પદ્ધતિ પોલીસ વિભાગની પરંપરાનો એક ભાગ છે, જે અધિકારી પ્રત્યેનો આદર અને સ્નેહ દર્શાવે છે. આ સાથે, જયદીપસિંહ જાડેજા પર પુષ્પવર્ષા પણ કરવામાં આવી હતી. જયદીપસિંહ જાડેજાએ મહીસાગરમાં કાયદો અને વ્યવસ્થા જાળવવામાં ઉત્કૃષ્ટ કામગીરી કરી હતી. તેમની કાર્યશૈલી, નિષ્ઠા અને પ્રજાલક્ષી અભિગમને કારણે તેઓ પોલીસકર્મીઓ અને સ્થાનિક લોકોમાં ખૂબ જ લોકપ્રિય બન્યા હતા.
