અમદાવાદ શહેરમાં કોર્પોરેટ લોન આપવાના બહાને વેપારીઓ સાથે લાખો રૂપિયાની છેતરપિંડી કરતી આંતરરાજ્ય ગેંગનો ઝોન-7 LCBની ટીમે પર્દાફાશ કર્યો છે. પોલીસે આ મામલે જીતેન્દ્ર મકવાણા, અલ્પેશ મકવાણા, કેયુર પટેલ અને શૈલેષ પરમાર નામના ચાર શખ્સોની ધરપકડ કરી છે. આ ટોળકી બેંક કરતા અડધા વ્યાજે કરોડોની લોન અપાવવાની લાલચ આપી સ્ટેમ્પ ડ્યુટીના નામે વેપારીઓ પાસેથી નાણાં પડાવી લેતી હતી.
આસામ અને તામિલનાડુના વેપારીઓ બન્યા ભોગ
તપાસમાં સામે આવ્યું છે કે, આ ગેંગે આસામના એક વેપારીને 100 કરોડની મોર્ગેજ લોન આપવાનું કહી 35 લાખ અને તામિલનાડુના વેપારીને 30 કરોડની લોન અપાવવાના બહાને 30 લાખ પડાવી લીધા હતા. આ અંગે બોડકદેવ અને સેટેલાઈટ પોલીસ મથકે ફરિયાદો નોંધાઈ હતી. ધરપકડ કરાયેલા આરોપીઓ પૈકી જીતેન્દ્ર અગાઉ બસ કંડક્ટર હતો, જ્યારે કેયુર રેપિડો ચલાવતો હતો. આ સામાન્ય દેખાતા શખ્સોને આગળ કરી મુખ્ય સૂત્રધાર વિકી શર્મા અને નીતાંત શર્મા છેતરપિંડીનું આખું નેટવર્ક ચલાવતા હતા.