બહેરામપુરામાં હિટ એન્ડ રનની ઘટના સામે આવી છે. જેમાં ગુટખા ખાવા નીકળેલ યુવકને બોલેરો પીકઅપવાને અડફેટે લેતાં સારવાર દરમ્યાન તેનું મોત નીપજ્યું હતું. અકસ્માત બાદ ચાલક ફરાર થઇ ગયો હતો. આ અંગે ટ્રાફ્કિ પોલીસે અજાણ્યા બોલેરો પીકઅપવાન ચાલક સામે ગુનો નોધીને વધુ તપાસ શરૂ કરી છે.
બહેરામપુરામાં રહેતા કંકુબેન પરમાર હોસ્પિટલમાં નોકરી કરે છે. તેમના 47 વર્ષીય પતિ હરીશભાઇ ધંધો કરતા હતા. ગત 26 ડિસેમ્બરે હરીશભાઇ સવારે ગુટખા ખાવા ઘરેથી નીકળ્યા હતા. અનેક કલાકો સુધી તે ઘરે ન આવતા તપાસ કરી હતી. શોધખોળ દરમ્યાન બહેરામપુરા ચોકી સામે હરીશભાઇ ઇજાગ્રસ્ત હાલતમાં મળી આવ્યા હતા. જેથી તેમને તાત્કાલિક સારવાર માટે હોસ્પિટલ ખસેડયા હતા. જ્યાં ગત 30 ડિસેમ્બરે તેમનું સારવાર દરમ્યાન મોત નિપજ્યુ હતુ. જેથી પરિવારે તપાસ કરતા તેઓ રસ્તા ચાલતા જતા હતા તે સમયે પુરઝડપે આવી રહેલ બોલેરો પીકઅપ વાને હરીશભાઇને અડફેટે લીધા હતા. બાદમાં તે નાસી ગયો હતો. આ અંગે કે ડિવિઝન ટ્રાફ્કિ પોલીસે અજાણ્યા બોલેરો પીકઅપવાન ચાલક સામે ગુનો નોધીને વધુ તપાસ શરૂ કરી છે.
