અમદાવાદ મ્યુનિસિપલ કોર્પોરેશન (AMC) સ્કૂલ બોર્ડ અને જાપાનની જગવિખ્યાત મ્યુઝિકલ ઇન્સ્ટ્રુમેન્ટ કંપની 'યામાહા' (Yamaha) વચ્ચે એક મહત્વપૂર્ણ એમઓયુ (MoU - મેમોરેન્ડમ ઓફ અંડરસ્ટેન્ડિંગ) કરવામાં આવ્યા છે. આ ભાગીદારી હેઠળ, મ્યુનિસિપલ શાળાઓમાં ભણતા સામાન્ય પરિવારના બાળકોને આંતરરાષ્ટ્રીય સ્તરની સંગીત તાલીમ મેળવવાની સુવર્ણ તક સાંપડશે.
પાયલોટ પ્રોજેક્ટ હેઠળ 1,692 વિદ્યાર્થીઓની પસંદગી
આ અનોખી પહેલના પ્રથમ તબક્કામાં પાયલોટ પ્રોજેક્ટ તરીકે અમદાવાદની 24 શાળાઓની પસંદગી કરવામાં આવી છે. આ શાળાઓના કુલ 1,692 વિદ્યાર્થીઓને પ્રોફેશનલ મ્યુઝિકલ ટ્રેનિંગ આપવામાં આવશે. આ પ્રોજેક્ટ પાછળનો મુખ્ય હેતુ બાળકોમાં ભણતરની સાથે-સાથે કલા અને સંગીતના કૌશલ્યનો વિકાસ કરવાનો છે, જેથી તેઓ વૈશ્વિક મંચ પર પણ પોતાની પ્રતિભા દર્શાવી શકે.