શેરબજારમાં રોકાણના બહાને નિર્દોષ નાગરિકો સાથે લાખો-કરોડોની છેતરપિંડી આચરતી સાયબર ગેંગનો અમદાવાદ સાયબર ક્રાઇમે પર્દાફાશ કર્યો છે. પોલીસે આ મામલે સુરતથી જયસુખભાઈ જીવાણી નામના આરોપીની ધરપકડ કરી છે. આ ઠગબાજે નકલી ટ્રેડિંગ એપ્લિકેશન અને સોશિયલ મીડિયા ગ્રુપ્સના માધ્યમથી રોકાણકારોને ઊંચા નફાની લાલચ આપી કુલ 55 લાખ રૂપિયાથી વધુની છેતરપિંડી આચરી હોવાનું બહાર આવ્યું છે.
“GOLD MEMBER GROUP-IEF” દ્વારા બિછાવી હતી જાળ
આરોપી જયસુખ જીવાણી અને તેની ગેંગની મોડસ ઓપરેન્ડી અત્યંત વ્યવસ્થિત હતી. તેઓ વોટ્સએપ પર “GOLD MEMBER GROUP-IEF” નામે ગ્રુપ બનાવી લોકોનો સંપર્ક કરતા હતા. રોકાણકારોનો વિશ્વાસ જીત્યા બાદ તેઓને એક નકલી ટ્રેડિંગ એપ ડાઉનલોડ કરાવતા હતા, જેમાં વર્ચ્યુઅલ રીતે મોટો નફો થતો દેખાતો હતો. આ નફાની લાલચમાં આવીને જ્યારે રોકાણકારો વધુ રકમ રોકવા તૈયાર થતા, ત્યારે આરોપીઓ અલગ-અલગ બેંક ખાતાઓમાં પૈસા ટ્રાન્સફર કરાવી તેને હડપી લેતા હતા.