અમદાવાદ શહેરના પોશ ગણાતા વસ્ત્રાપુર વિસ્તારમાં આવેલી સરકારી વસાહતમાં આજે આગની એક ગંભીર ઘટના બની હતી. વસાહતના એક બ્લોકમાં 8મા માળે અચાનક આગ ફાટી નીકળતા અફરાતફરીનો માહોલ સર્જાયો હતો. આ ઘટનામાં સૌથી વધુ ચિંતાજનક બાબત એ હતી કે, જ્યારે આગ લાગી ત્યારે 10 વર્ષની માસૂમ બાળકી 'વિશ્વા' ફ્લેટની અંદર ફસાઈ ગઈ હતી.
સરકારી વસાહતના 8મા માળે લાગી આગ
આગની જાણ થતા જ અમદાવાદ ફાયર બ્રિગેડની ટીમ કાફલા સાથે ઘટનાસ્થળે દોડી ગઈ હતી. ઉપરના માળેથી ધુમાડાના ગોટેગોટા નીકળી રહ્યા હતા અને બાળકી અંદર ફસાયેલી હોવાની માહિતી મળતા જ ફાયર જવાનોએ જીવના જોખમે રેસ્ક્યુ ઓપરેશન હાથ ધર્યું હતું. ધુમાડા અને ગભરાટભરી પરિસ્થિતિ વચ્ચે ફાયર જવાનો બહાદુરીપૂર્વક 8મા માળે પહોંચ્યા હતા અને નાની વિશ્વાને સુરક્ષિત રીતે બહાર કાઢી લાવ્યા હતા.
