સાબરમતી નદીમાં માછલીઓના મોત અંગે સત્તાધીશો અજાણ, જળયાત્રાના નામે 22મી સુધીમાં પાણી આવશે

સાબરમતી નદીમાં માછલીઓના મોત અંગે સત્તાધીશો અજાણ, જળયાત્રાના નામે 22મી સુધીમાં પાણી આવશે

દેશની સૌથી વધુ પ્રદૂષિત નદીઓમાંની એક એવી સાબરમતી નદીમાં સફાઈ કરવાનુ એક નાટક મ્યુનિસિપલ કોર્પોરેશનના અધિકારીઓ અને રાજકીય નેતાઓએ આ મહિનાની શરૂઆતમાં કર્યું હતું.જે દરમિયાન ફોટો સેશન કરી અલગ અલગ સોશિયલ મીડિયા ઉપર નદી સફાઈને લઈ વાહવાહી મેળવવા પ્રયાસ કરાયો હતો. દરમિયાન ગુરુવારે સાબરમતી નદીમાં રેલવે બ્રિજ પાસે નદીના વચ્ચેના ભાગમાં પાણીના અભાવે મોટી સંખ્યામાં માછલીઓના મોત થયા હોવા અંગેનો વીડિયો સોશિયલ મીડિયા ઉપર વાઈરલ થયો છે. સ્ટેન્ડિંગ કમિટી ચેરમેનને આ બાબતમાં પૂછાતા તેઓ આ બાબતે કશું જાણતા નહોતા. ઉપરથી તેમના કહેવા પ્રમાણે, જગન્નાથ મંદિર ખાતેથી દર વર્ષે રથયાત્રા અગાઉ નીકળતી જળયાત્રાને ધ્યાનમાં લઈ સિંચાઈ વિભાગને નદીમાં પાણી છોડવા રજૂઆત કરાઈ છે. 22 જૂન સુધીમાં નદીમાં પાણી આવી જશે.

આ મહિનાના આરંભે 1થી 5 જૂન સુધીના સમયમાં સાબરમતી નદીમાંથી કુલ મળીને 198 ટન કચરો કાઢવામાં આવ્યો હોવાનો કોર્પોરેશન તંત્ર દ્વારા દાવો કરાયો હતો. નદી સફાઈ અગાઉ પાણી ખાલી કર્યા પછી પણ માત્ર કિનારાના ભાગોમાંથી જ સફાઈ કરાઈ હતી.વચ્ચેના ભાગમાંથી સફાઈ થાય તો વર્ષોથી જમા થયેલો કાંપ દૂર થાય અને નદીમાં પાણી સંગ્રહ વધુ પ્રમાણમાં થઈ શકે. પરંતુ તંત્ર કે સત્તાધીશોને કામગીરી કરી એવું બતાવવા જ નદીની સફાઈ કરવાની હતી. સાબરમતી નદીમાં મોટી સંખ્યામાં માછલીઓના મોત થયા અંગે સાબરમતી રિવરફ્રન્ટના અધિકારીના કહેવા પ્રમાણે, તંત્ર તરફથી વીડિયોમાં બતાવેલા સ્થળે તપાસ કરાવાઈ તો પાણી ઓછું થવાથી માછલીઓ મરી ગઈ છે પણ તેની સંખ્યા 50-100થી વધુ હોય એમ હું નથી માનતો.

ગુજરાતના વધુ સમાચાર વાંચવા માટે ક્લિક કરો