કેન્દ્રીય ગૃહ મંત્રી અમિત શાહ 7 માર્ચની સાંજે અમદાવાદ આવી પહોંચશે. આ પ્રવાસ ખાસ એટલા માટે છે કારણ કે 9 માર્ચે અમદાવાદ મહાનગરપાલિકા (AMC) ની વર્તમાન ટર્મ પૂર્ણ થઈ રહી છે. ટર્મ પૂરી થાય તે પહેલાં, 8 માર્ચે અમિત શાહ શહેરના પૂર્વ વિસ્તારના નાગરિકો માટે અત્યંત મહત્વના એવા બે મોટા પ્રોજેક્ટ્સનું ઉદ્ઘાટન અને લોકાર્પણ કરશે.
પૂર્વ અમદાવાદને મળશે આધુનિક સુવિધાઓ
આ પ્રવાસ દરમિયાન અમિત શાહ નીચે મુજબના પ્રોજેક્ટ્સ જનતાને સમર્પિત કરશે, પૂર્વ વિસ્તારના ખેલાડીઓ અને યુવાનો માટે રૂ.61.67 કરોડના ખર્ચે તૈયાર કરવામાં આવેલા અત્યાધુનિક સ્પોર્ટ્સ કોમ્પ્લેક્સનું ઉદ્ઘાટન કરવામાં આવશે. આ કોમ્પ્લેક્સમાં રમતગમતની આધુનિક સુવિધાઓ ઉપલબ્ધ કરાવાઈ છે. વર્ષોથી જેની પ્રતીક્ષા હતી તેવી ખારીકટ કેનાલના ડેવલપમેન્ટના પ્રથમ તબક્કાનું લોકાર્પણ થશે. નરોડાથી વિંઝોલ સુધીના 12 કિલોમીટર લાંબા રૂટ પર ફેઝ-1ની કામગીરી પૂર્ણ કરવામાં આવી છે, જેનાથી સ્થાનિક રહીશોને મોટી રાહત મળશે.
