રાજ્યભરમાં સાર્વત્રિક વરસાદી માહોલ જામ્યો છે. સ્ટેટ ઈમરજન્સી ઓપરેશન સેન્ટરના રિપોર્ટ અનુસાર, છેલ્લા 24 કલાક દરમિયાન રાજ્યના 28 જિલ્લાના 193 તાલુકાઓમાં નોંધપાત્ર વરસાદ થયો છે. દક્ષિણ ગુજરાતમાં મેઘરાજાનું રૌદ્ર સ્વરૂપ જોવા મળ્યું છે, જેમાં સૌથી વધુ તાપીના ઉકાઈમાં 300 મીમી એટલે કે 12 ઈંચ વરસાદ ખાબક્યો છે. સપ્ટેમ્બર મહિનામાં સતત વરસી રહેલા વરસાદને કારણે ખેડૂતો અને નાગરિકોમાં આનંદની લહેર છવાઈ ગઈ છે.
સૌથી વધુ વરસાદ ધરાવતા પાંચ તાલુકા
છેલ્લા 24 કલાકમાં દક્ષિણ ગુજરાતના વિવિધ વિસ્તારોમાં ભારેથી અતિભારે વરસાદ નોંધાયો છે. સૌથી વધુ વરસાદ ધરાવતા મુખ્ય વિસ્તારો...
- ઉકાઈ (તાપી): 300 મીમી (12 ઈંચ)
- ઉમરપાડા (સુરત): 212 મીમી (8.4 ઈંચ)
- સુબિર (ડાંગ): 145 મીમી (5.8 ઈંચ)
- વાઘઈ (ડાંગ): 144 મીમી (5.7 ઈંચ)
- સોનગઢ (તાપી): 140 મીમી (5.5 ઈંચ)
ઝોન વાઈઝ વરસાદની પરિસ્થિતિ
રાજ્યના વિવિધ ઝોનમાં વરસાદની સ્થિતિ અલગ-અલગ જોવા મળી છે. દક્ષિણ ગુજરાતમાં મોસમનો કુલ 108.35% વરસાદ પૂર્ણ થઈ ચૂક્યો છે:
- દક્ષિણ ગુજરાત: 24 કલાકમાં સરેરાશ 60.14 મીમી વરસાદ.
- પૂર્વ-મધ્ય ગુજરાત: સરેરાશ 19.13 મીમી વરસાદ (આણંદમાં 60 મીમી, નડિયાદમાં 63 મીમી, મોરવા હડફમાં 52 મીમી અને વડોદરામાં 21 મીમી).
- સૌરાષ્ટ્ર: સરેરાશ 5.73 મીમી વરસાદ (ભાવનગરના ઘોઘામાં 82 મીમી, ભાવનગર શહેરમાં 45 મીમી).
- ઉત્તર ગુજરાત: સરેરાશ 3.79 મીમી વરસાદ (સતલાસણામાં 36 મીમી).
- કચ્છ: આ પ્રદેશમાં વરસાદ સંપૂર્ણપણે શૂન્ય (0.00 મીમી) નોંધાયો છે.
ગુજરાતમાં અત્યાર સુધીમાં મોસમનો કુલ સરેરાશ વરસાદ 707.32 મીમી સાથે 77.82% પૂર્ણ થયો છે.
જળાશયોની સ્થિતિ: સરદાર સરોવર છલોછલ
ગુજરાત નર્મદા અને જળસંપત્તિ વિભાગના તાજેતરના અહેવાલ મુજબ, રાજ્યના કુલ 207 મુખ્ય જળાશયોમાં હાલ 75.75% જળસંગ્રહ ઉપલબ્ધ છે. રાજ્યની જીવાદોરી સમાન સરદાર સરોવર ડેમ તેની કુલ ક્ષમતાના 93.23% (8,819.40 MCM) ભરાઈ ચૂક્યો છે. દક્ષિણ ગુજરાતના 13 માંથી 6 ડેમો 100% ભરાઈ ગયા છે.
| ઝોન | જળાશયોની સંખ્યા | વર્તમાન જળસંગ્રહ (%) |
દક્ષિણ ગુજરાત
| 13 | 77.76% |
| મધ્ય ગુજરાત | 17 | 62.31%
|
| સૌરાષ્ટ્ર | 141 | 49.02% |
| ઉત્તર ગુજરાત | 15 | 42.32% |
| કચ્છ | 20 | 22.87% |
હાઈ એલર્ટ અને ચેતવણી હેઠળના મુખ્ય ડેમો
રાજ્યમાં ભારે પાણીની આવકના કારણે કેટલાક મુખ્ય ડેમો માટે સતર્કતાનું એલર્ટ જાહેર કરવામાં આવ્યું છે:
- હાઈ એલર્ટ: શેત્રુંજી (98.42%), રંઘોળા (99.65%), માલણ (98.51%), ઝૂઝ (100%), કેલિયા (100%), ઢોલી (100%), અને બ્રાહ્મણી ડેમ (92.97%).
- એલર્ટ: દમણગંગા (84.71%), સુખી (85.88%), કાળી-2 (91.80%), મછાનનાળા (88.58%), અને વણાકબોરી (96.01%).
- વોર્નિંગ: ઉકાઈ ડેમ (77.25%), કરજણ ડેમ (74.22%), અને લીંબડી-ભોગાવો-1 (77.71%).
પીવાના પાણી અને સિંચાઈ માટે રાહત
સરદાર સરોવર અને દક્ષિણ-મધ્ય ગુજરાતના ડેમોમાં વિપુલ પ્રમાણમાં પાણીનો જથ્થો સંગ્રહિત થતાં આવનારા સમયમાં ખેતી માટે સિંચાઈ અને પીવાના પાણીની સમસ્યામાંથી મોટી રાહત મળશે. જોકે, કચ્છ, ઉત્તર ગુજરાત અને સૌરાષ્ટ્રના કેટલાક વિસ્તારોમાં હજુ પણ પાણીની આવક પ્રમાણમાં ઓછી છે.
આ પણ વાંચો: 14 September Top News: હિન્દી દિવસ અને ગણેશ ચતુર્થીનો સુભગ સમન્વય, જાણો આજનો દેશ-વિદેશનો ઐતિહાસિક વારસો
