અમદાવાદ પોલીસની પીસીબી (PCB) શાખાએ એક સરાહનીય અને મોટી કામગીરી કરીને આંતરરાજ્ય દારૂ તસ્કરીના રેકેટનો પર્દાફાશ કર્યો છે. અમદાવાદના પૂર્વ વિસ્તારમાં આવેલા નિકોલ રિંગરોડ પરથી પોલીસે બાતમીના આધારે લાખો રૂપિયાની કિંમતની 22,668 વિદેશી દારૂની બોટલો ભરેલી ટ્રક ઝડપી પાડી છે. પોલીસે આ રેડ દરમિયાન દારૂ અને વાહન સહિત કુલ રૂપિયા 1.19 કરોડનો મુદ્દામાલ જપ્ત કરીને કાયદેસરની કાર્યવાહી હાથ ધરી છે.
ચંદીગઢથી લોડ થઈને વડોદરા જતો હતો જથ્થો
પોલીસના ઉચ્ચ અધિકારીઓ પાસેથી મળતી વિગતો મુજબ, પીસીબી ટીમને ચોક્કસ બાતમી મળી હતી કે પરપ્રાંતમાંથી વિદેશી દારૂનો એક મોટો જથ્થો અમદાવાદ થઈને વડોદરા તરફ પસાર થવાનો છે. આ બાતમીના આધારે નિકોલ રિંગરોડ પર ચુસ્ત નાકાબંધી ગોઠવવામાં આવી હતી. શંકાસ્પદ ટ્રક આવતાં જ તેને રોકીને તલાશી લેવાતા તેમાંથી અલગ-અલગ બ્રાન્ડની વિદેશી દારૂની 22,668 બોટલો મળી આવી હતી. પોલીસ પૂછપરછમાં ડ્રાઇવરે કબૂલાત કરી હતી કે આ દારૂનો જથ્થો ચંદીગઢથી ભરવામાં આવ્યો હતો અને વડોદરાના કોઈ સ્થાનિક બુટલેગરને ડિલિવરી આપવાની હતી.