ઉતરાયણના દિવસે પવનની ગતિ 5 થી 15 કિમી પ્રતિ કલાક રહેશે, હવામાન વિભાગનું અનુમાન છે કે, આગામી 7 દિવસ વાતાવરણ સુકૂં રહેશે અને આગામી 3 દિવસ લઘુતમ તાપમાન વધશે અને ત્યાર પછી 4 દિવસમાં 2 થી 3 ડિગ્રી તાપમાન ઘટશે સાથે સાથે લઘુતમ તાપમાન 16 ડિગ્રી રહેશે અને નલિયામાં લઘુતમ તાપમાન 6 ડિગ્રી નોંધાયું છે, અમરેલીમાં લઘુત્તમ તાપમાન 9 ડિગ્રી નોંધાયું અને અમદાવાદમાં આજે 16 ડિગ્રી તાપમાન છે, આગામી 24 કલાકમાં તાપમાન 1 ડિગ્રી ઘટી શકે છે.
ઉત્તર ભારતમાં ઠંડી સતત નિતનવા રેકોર્ડ બનાવી રહી છે
ઘણા પહાડી વિસ્તારોમાં બરફની ચાદર છવાઇ ગઇ છે તો મેદાન વિસ્તારોમાં ગાત્રો થીજવતી ઠંડીએ લોકોને કંપારી છોડાવી દીધી છે. દેશના ઘણા વિસ્તારોમાં ભીષણ ઠંડીને કારણે પારો શૂન્ય ડિગ્રીની નજીક પહોંચી ગયો છે અને ઘણા સ્થળોએ ઠંડીએ રેકોર્ડ તોડયો છે. ઉત્તર ભારતમાં આકરી ઠંડી પડી રહી છે. અહીં બે દિવસ રાજસ્થાન, પંજાબ, હરિયાણા, દિલ્હી, હિમાચલ પ્રદેશ, ઉત્તરાખંડમાં શીતલહેરની ચેતવણી અપાઈ છે. ત્યારબાદ કેટલાક વિસ્તારોમાં 14 જાન્યુઆરીએ પણ ભારે ઠંડી પડશે. જોકે, તે બાદ તેમાં રાહત મળશે અને ઠંડીમાં કમી આવશે.