શહેરમાં સાયબર ક્રાઈમના વધતા જતા બનાવો વચ્ચે પાલડી પોલીસે એક મહત્વની સફળતા મેળવી છે. સાયબર ફ્રોડના નાણાં પોતાના બેંક એકાઉન્ટમાં મેળવીને ગુનેગારોને મદદ કરનાર ગોમતીપુરના એક યુવકની પોલીસે ધરપકડ કરી છે. આ મામલે પોલીસે અન્ય એક ફરાર આરોપીની શોધખોળ પણ તેજ કરી છે.
20 હજારની લાલચમાં લાખોનું ટ્રાન્ઝેક્શન
પાલડી પોલીસે બાતમીના આધારે ગોમતીપુર વિસ્તારમાં રહેતા સાહિલ અંસારી નામના શખ્સની ધરપકડ કરી છે. તપાસમાં બહાર આવ્યું છે કે, સાહિલે માત્ર ૨૦ હજાર રૂપિયાના કમિશનની લાલચમાં પોતાનું પર્સનલ બેંક એકાઉન્ટ સાયબર ઠગોને ભાડે આપ્યું હતું. આ એકાઉન્ટનો ઉપયોગ છેતરપિંડીના નાણાં મેળવવા માટે કરવામાં આવતો હતો. પ્રાથમિક તપાસમાં સાહિલના ખાતામાં અંદાજે ૧૦ લાખ રૂપિયા જેટલી મોટી રકમ ટ્રાન્સફર થઈ હોવાનું સામે આવ્યું છે.
3 રાજ્યોમાં ગુનાહિત કનેક્શન
પોલીસ તપાસ દરમિયાન જે ચોંકાવનારી વિગત બહાર આવી છે તે મુજબ, સાહિલ અંસારીના આ બેંક એકાઉન્ટ વિરુદ્ધ માત્ર ગુજરાતમાં જ નહીં, પરંતુ દેશના અન્ય ૩ રાજ્યોમાં પણ સાયબર ફ્રોડની ફરિયાદો નોંધાઈ ચૂકી છે. આનાથી સ્પષ્ટ થાય છે કે આરોપીનું એકાઉન્ટ આંતરરાજ્ય સાયબર ગેંગ દ્વારા વાપરવામાં આવી રહ્યું હતું.
મુખ્ય સૂત્રધાર ફરાર
આ સમગ્ર કૌભાંડમાં સાહિલની ધરપકડ બાદ હવે પોલીસ મુખ્ય આરોપી તાહા તન્વીર કાદરીની પાછળ પડી છે. તાહા કાદરી હાલ પોલીસ પકડથી દૂર છે અને તે જ સાયબર ફ્રોડના નાણાં ક્યાં અને કેવી રીતે ટ્રાન્સફર કરવા તે નક્કી કરતો હતો. પાલડી પોલીસે તાહાને પકડવા માટે અલગ-અલગ ટીમો બનાવી તપાસના ચક્રો ગતિમાન કર્યા છે.
આ પણ વાંચો: Surat: ઝઘડા બાદ પ્રેમિકાનો આપઘાત, દીકરીના મોતના આઘાતમાં માતાને બ્રેઈન હેમરેજ
