બોટાદ જિલ્લાના ટાટમ ગામના રહેવાસી ભનીબેન હરેશભાઈ મણદુરિયા નામના મહિલા ગર્ભાશયની કોથળીના ઓપરેશન માટે અમરેલી સિવિલ હોસ્પિટલમાં દાખલ થયા હતા. જોકે, સારવાર દરમિયાન તેમનું મૃત્યુ થતા હોસ્પિટલ પરિસરમાં તંગદિલી સર્જાઈ હતી. મૃતકના પરિવારજનોનો આક્ષેપ છે કે તબીબોની લાપરવાહીને કારણે ભનીબેનનું મોત થયું છે. આ ઘટનાને પગલે મોટી સંખ્યામાં પરિવારજનો હોસ્પિટલ ખાતે એકઠા થયા હતા.
તબીબની બેદરકારીથી મોતના પરિજનના આક્ષેપ
કોંગ્રેસ નેતા જેનીબેન ઠુમ્મર પણ હોસ્પિટલ દોડી આવ્યા હતા અને પીડિત પરિવાર સાથે મુલાકાત કરી ન્યાયની માંગ કરી હતી. ઘટનાની ગંભીરતાને જોતા હોસ્પિટલ અને પોલીસ તંત્ર એક્શનમાં આવ્યું છે: હોસ્પિટલ સુપ્રિટેન્ડન્ટ દ્વારા પરિવારને આ મામલે નિષ્પક્ષ તપાસ કરવાની ખાતરી આપવામાં આવી છે. મોતનું સચોટ કારણ જાણવા માટે મૃતદેહને પેનલ પોસ્ટમોર્ટમ માટે ભાવનગર મોકલવામાં આવ્યો છે.
