Amreli: જળસંગ્રહ ક્ષમતા વધારવા પહેલ, વડેરા ખાતે 26.95 લાખના ખર્ચે ચેકડેમનું ખાતમુહૂર્ત

અમરેલી જિલ્લાના વડેરા ગામ ખાતે જળસંચયની દિશામાં એક મહત્ત્વપૂર્ણ પગલું ભરવામાં આવ્યું છે. રાજ્યમંત્રી કૌશિકભાઈ વેકરીયાના હસ્તે અહીં 1.05 કરોડ લીટરની સંગ્રહ ક્ષમતા ધરાવતા એક નવા ચેકડેમના નિર્માણ કાર્યનું ખાતમુહૂર્ત કરવામાં આવ્યું છે.

 વિસ્તારની જમીનના તળ ઊંચા આવશે

આ ચેકડેમનું નિર્માણ જળસિંચન રાજ્ય વિભાગ હસ્તક કરવામાં આવશે. આ પ્રોજેક્ટનો અંદાજિત ખર્ચ રૂ. 26.95 લાખ જેટલો છે. ચેકડેમનું નિર્માણ થતાં અમરેલી તાલુકાના વડેરા ગામ તેમજ આસપાસના વિસ્તારોમાં સૌથી મોટો લાભ એ થશે કે જમીનના પાણીના તળ ઊંચા આવશે.આ પ્રોજેક્ટથી માત્ર વડેરા જ નહીં, પણ આસપાસના ગામોના કૃષિકારો સહિતના રહીશોને સીધો ફાયદો થશે. પાણીના તળ ઊંચા આવવાથી કૃષિ અને પિયત માટે પૂરતું પાણી ઉપલબ્ધ થશે, જેના પરિણામે ખેડૂતોની આવકમાં વધારો થશે.

ગુણવત્તા અને સમયમર્યાદા પર ભાર

ખાતમુહૂર્ત પ્રસંગે રાજ્યમંત્રી કૌશિકભાઈ વેકરીયાએ નિર્માણ સ્થળની મુલાકાત લીધી હતી અને સમગ્ર કાર્યનું નિરીક્ષણ કર્યું હતું. તેમણે સંબંધિત અધિકારીઓને ભારપૂર્વક જણાવ્યું હતું કે, આ ચેકડેમનું કામ સમય મર્યાદામાં અને ઉચ્ચ ગુણવત્તાયુક્ત રીતે પૂર્ણ થવું જોઈએ, જેથી ખેડૂતોને વહેલી તકે તેનો લાભ મળી શકે.અમરેલી જિલ્લામાં આ પ્રકારના જળસંચયના કાર્યો સ્થાનિક પર્યાવરણ અને કૃષિ અર્થતંત્રને મજબૂત બનાવવામાં નિર્ણાયક ભૂમિકા ભજવશે.

વધુ સમાચાર વાંચવા ડાઉનલોડ કરો સંદેશ ન્યૂઝ એપ