ઉત્તરાયણનો તહેવાર નજીક આવતા જ પતંગબાજીનો ઉત્સાહ વધ્યો છે, પરંતુ આ ઉત્સાહ ક્યારેક માતમમાં ફેરવાઈ જાય છે. આણંદ જિલ્લાના ખંભાત તાલુકાના ઉંદેલ ગામે પતંગ લૂંટવા જતાં એક 15 વર્ષીય કિશોરનું વીજ કરંટ લાગવાથી મોત નીપજ્યું છે. ઉંદેલ ગામની કોઠીયા સીમમાં આ કરુણ અકસ્માત સર્જાયો હતો. એક 15 વર્ષીય કિશોર આકાશમાં કતરાયેલી પતંગને લૂંટવા માટે દોડી રહ્યો હતો.
ઉંદેલ ગામની કોઠીયા સીમમાં વીજ કરંટથી થયું મોત
પતંગ લૂંટવાની લ્હાયમાં તે ગાયો-ભેંસો બાંધવા માટે બનાવેલા એક શેડ પાસે પહોંચ્યો હતો. આ શેડ નીચેથી પસાર થતી વીજ લાઈન અથવા શેડના લોખંડના ભાગમાં ઉતરેલા વીજ કરંટના સંપર્કમાં કિશોર આવી ગયો હતો. વીજ કરંટ એટલો જોરદાર હતો કે કિશોરનું ઘટનાસ્થળે જ કરુણ મોત નીપજ્યું હતું. બનાવની જાણ થતા જ પરિવાજનો અને ગ્રામજનો ઘટનાસ્થળે દોડી આવ્યા હતા.
