દસ દિવસ સુધી જે ગણેશજીની ભાવપૂર્વક આરતી ઉતારી, ભક્તિભાવથી લાડ લડાવ્યા અને ગણપતિ બાપ્પા મોરિયા, પુઢચ્યા વર્ષી લવકર યા ના ગગનભેદી નારા સાથે અશ્રુંભીની આંખે જેમને વિદાય આપી-તે જ દુંદાળા દેવની આવી દયનીય હાલત જોઈને કોઈ પણ શ્રાદ્ધાળુનું હૃદય દ્રવી ઊઠે. ?અંકલેશ્વરના દીવા રોડ પર અંકલેશ્વર નગરપાલિકા દ્વારા તૈયાર કરાયેલા કૃત્રિમ કુંડમાં પાલિકા તંત્રની ઘોર લાપરવાહીના વરવા દ્રશ્યો સામે આવ્યા છે. પર્યાવરણના જતન અને ભક્તિના નામે બનાવાયેલા આ કુંડમાં યોગ્ય માત્રામાં પાણી ન ભરતાં વિઘ્નહર્તાની મૂર્તિઓનું યોગ્ય અને સન્માનજનક વિસર્જન થઈ શક્યું નથી.
કુંડમાં પૂરતું પાણી ન હોવાને કારણે શ્રીજીની મૂર્તિઓ જળ સમાધિ લેવાના બદલે પ્લાસ્ટિકના તાડપત્રીવાળા કુંડમાં અધવચ્ચે કાદવ-કીચડ અને છીછરા ગંદા પાણીમાં રઝળતી જોવા મળી રહી છે. ક્યાંક મૂર્તિઓ એકબીજા પર અસ્તવ્યસ્ત પડેલી છે તો ક્યાંક ભગવાનના શ્રીઅંગો છીછરા પાણીની બહાર ખુલ્લા પડી રહ્યા છે. જે દેવની એક ઝલક મેળવવા ભક્તો કલાકો સુધી હાથ જોડીને ઊભા રહેતા હતા, તે જ દેવ આજે તંત્રની અણઆવડતના પાપે અસહાય અવસ્થામાં પડેલા જોવા મળે છે.