ભરૂચ જિલ્લામાં ગેરકાયદેસર પ્રવૃત્તિઓ પર લગામ કસવા માટે પોલીસ એક્શન મોડમાં છે. અંકલેશ્વરના પટેલ નગર વિસ્તારમાં ધમધમતા એક જુગારધામ પર ભરૂચ ક્રાઈમ બ્રાન્ચે ઓચિંતા દરોડા પાડીને જુગાર રમી રહેલા 6 શખ્સોને રંગેહાથ ઝડપી પાડ્યા છે. પોલીસે સ્થળ પરથી રોકડ રકમ સહિત કુલ રૂ. 1.24 લાખનો મુદ્દામાલ કબજે કર્યો છે.
અંકલેશ્વરમાં જુગારના અડ્ડા પર દરોડા
ભરૂચ ક્રાઈમ બ્રાન્ચની ટીમ અંકલેશ્વર વિસ્તારમાં પેટ્રોલિંગમાં હતી, તે દરમિયાન તેમને ગુપ્ત બાતમી મળી હતી કે પટેલ નગર નજીક આવેલી ઝૂંપડપટ્ટી પાસે કેટલાક લોકો એકઠા થઈને હાર-જીતનો જુગાર રમી રહ્યા છે. બાતમીના આધારે પોલીસે વ્યૂહાત્મક રીતે દરોડો પાડતા જુગારીઓમાં નાસભાગ મચી ગઈ હતી, પરંતુ પોલીસે કોર્ડન કરીને ૬ આરોપીઓને દબોચી લીધા હતા. ઝડપાયેલા આરોપીઓના નામ 1. સંજય ચૌહાણ 2. લાલચંદ વિશ્વકર્મા 3. મોતી માંગગારોડી 4. સુરેશ ચુડાસમા 5. રાજુ વાઘરી 6. અજય વસાવા છે.
