ભરૂચ જિલ્લાના અન્ય તાલુકાઓ સહિત ઝઘડિયા તાલુકામાં પણ વિતેલા 3 દિવસો દરમિયાન વાદળછાયા વાતાવરણ વચ્ચે મેઘો વરસતા તાલુકામાં વરસાદી માહોલ છવાયો હતો.સતત બે દિવસથી તાલુકાના મોટાભાગના વિસ્તારોમાં મેઘો મન મુકીને વરસતા લોકોએ વાતાવરણમાં પ્રવર્તમાન ઉકળાટથી રાહત મેળવી હતી.
રાજ્યના હવામાન વિભાગની આગાહી મુજબ આગામી 8 મી તારીખ સુધી રાજ્યમાં ભારે વરસાદની સંભાવના છે,તેમાં તા.5 અને 6 દરમિયાન અતિભારે વરસાદ થઇ શકે એમ પણ હવામાન વિભાગ દ્વારા જણાવાયું છે.દક્ષિણ ગુજરાતના સુરત,વલસાડ અને ભરૂચ જિલ્લામાં પણ પવન ફુંકાવા સાથે મુશળધાર વરસાદ વરસવાની સંભાવના વચ્ચે ઝઘડિયા તાલુકામાં પણ વરસાદી માહોલથી જનજીવન પ્રભાવિત થયું છે. તાલુકામાં 3 દિવસથી ચોમાસું માહોલ વચ્ચે પ્રમાણમાં સારો ગણાય તેવો વરસાદ થતાં ચોમાસું પાકને ફયદો થશે એવી આશા ખેડૂત વર્ગમાં જણાય છે.