ભાવનગર જિલ્લાના ભાલ પંથકમાં આવેલા માઢીયા ગામે લાંબા સમયથી ધમધમતી દેશી દારૂની ભઠ્ઠી પર સનેસ પોલીસે ઓચિંતી રેડ પાડી છે. પોલીસને બાતમી મળી હતી કે માઢીયા ગામની સીમમાં મોટા પાયે દેશી દારૂ ગાળવાની પ્રવૃત્તિ ચાલી રહી છે, જેના આધારે કાફલાએ દરોડો પાડી ગેરકાયદેસર અડ્ડાનો પર્દાફાશ કર્યો હતો.
મોટી માત્રામાં મુદ્દામાલ નષ્ટ કરાયો
સનેસ પોલીસની આ કાર્યવાહી દરમિયાન સ્થળ પરથી દેશી દારૂ બનાવવાની સામગ્રી અને તૈયાર દારૂનો જથ્થો મળી આવ્યો હતો. પોલીસે ઘટનાસ્થળેથી અંદાજે 995 લિટર દેશી દારૂ ગાળવાનો આથો તેમજ 8 લિટર તૈયાર દેશી દારૂ જપ્ત કરી તેનો સ્થળ પર જ નાશ કર્યો હતો. આ ભઠ્ઠી ચલાવવા બદલ પોલીસે શિલ્પાબેન પાલીયા નામની મહિલા વિરુદ્ધ કાયદેસરનો ગુનો નોંધી આગળની તપાસ હાથ ધરી છે.