ભાવનગર શહેરમાં સામાન્ય બાબતમાં હિંસાની ઘટનાઓ વધી રહી છે. આવી જ એક ઘટના સુભાષનગર આવાસ યોજનામાં બની છે, જ્યાં ફૂલના કુંડા મૂકવા બાબતે થયેલા વિવાદે ઉગ્ર સ્વરૂપ ધારણ કર્યું હતું. પાંચ જેટલા શખ્સોએ ભેગા મળીને એક પરિવાર પર જીવલેણ હુમલો કર્યો હતો.
ભાવનગરમાં ફૂલના કુંડા મુકવા બાબતે મારામારી
પ્રાપ્ત માહિતી અનુસાર, સુભાષનગર ગોકુલ સોસાયટી પાસે આવેલી આવાસ યોજનામાં રહેતા એક પરિવારે પોતાના ઘર પાસે ફૂલછોડના કુંડા મૂક્યા હતા. આ કુંડાને અમુક શખ્સોએ ફોડી નાખતા ઘરના મોભીએ તેમને ઠપકો આપ્યો હતો.આ સામાન્ય ઠપકાની દાઝ રાખીને પાંચ જેટલા શખ્સોએ ભેગા મળીને આ આખા પરિવાર પર હુમલો કર્યો હતો અને તેમને માર માર્યો હતો. હુમલામાં પરિવારના સભ્યોને ઈજાઓ પહોંચી હતી. આ સમગ્ર મારામારીની ઘટના આસપાસ લગાવેલા CCTV કેમેરામાં કેદ થઈ ગઈ હતી, જેના ફૂટેજ પણ હવે સામે આવ્યા છે.
