તહેવારોના આ દિવસોમાં નાગરિકો પરિવાર સાથે ગરબા મહોત્સવ અને અન્ય સ્થળોએ જતા હોય છે, ત્યારે પાછળથી ઘરો અને વાહનોની સુરક્ષા એક મોટો પ્રશ્ન બની જાય છે. આ પરિસ્થિતિને ધ્યાનમાં રાખીને છોટાઉદેપુર પોલીસ દ્વારા કોઈ અનિચ્છનીય બનાવ, ઘરફોડ ચોરી કે વાહનચોરી ન બને તે માટે કડક સુરક્ષા વ્યવસ્થા અને વિશેષ તકેદારી રાખવામાં આવી રહી છે.
તહેવાર દરમિયાન રાત્રિના સમયે અસામાજિક તત્વો કે ચોરો સક્રિય ન થાય તે માટે છોટાઉદેપુર પોલીસ દ્વારા આધુનિક ટેકનોલોજીનો ઉપયોગ કરવામાં આવી રહ્યો છે. હાઇટેક ડ્રોન વિવિધ વિસ્તારો, સાંકડી ગલીઓ, શેરીઓ અને સંવેદનશીલ વિસ્તારોનું ડ્રોન કેમેરા મારફ્તે રાત્રિના સમયે સઘન નિરીક્ષણ કરવામાં આવી રહ્યું છે. શંકાસ્પદ પ્રવૃત્તિઓ પર નજરઃ એવા વિસ્તારો જ્યાં કોઈ વ્યક્તિ છુપાઈને ચોરી કે ગુનાહિત પ્રવૃત્તિ કરવાનો પ્રયાસ કરી શકે, ત્યાં ડ્રોન દ્વારા સતત નજર રાખવામાં આવી રહી છે.