દર વર્ષે 4 ફેબ્રુઆરીએ વિશ્વ કેન્સર દિવસ ઉજવાય છે આ વર્ષની થીમ United by Unique છે, જે વ્યક્તિ કેન્દ્રિત કેન્સર સંભાળ પર ભાર મૂકે છે. ગુજરાતમાં કેન્સર એક ગંભીર બિમારી બની રહી છે અને સતત કેસોનો વધારો થઈ રહ્યો છે. રાજ્ય આરોગ્ય વિભાગના આંકડા મુજબ છેલ્લા ચાર વર્ષમાં ૩૦ વર્ષથી વધુ ઉંમરના ૩ કરોડથી વધુ નાગરિકોનું મોંઢાના કેન્સર માટે સ્ક્રીનિંગ કરાયું છે.
સ્તન કેન્સરના કેસો પણ વધ્યા
આ ઉપરાંત ૧.૬ કરોડથી વધુ મહિલાઓનું સ્તન કેન્સર અને ૮૨ લાખથી વધુ મહિલાઓનું સર્વાઇકલ કેન્સર સ્ક્રીનિંગ કરવામાં આવ્યું છે. ICMR-NCDIRના અહેવાલ મુજબ ગુજરાતમાં પુરુષોમાં દર ૯ માંથી ૧ અને મહિલાઓમાં દર ૧૨ માંથી ૧ને જીવનકાળ દરમિયાન કેન્સર થવાનો જોખમ છે. ગુજરાત કેન્સર એન્ડ રિસર્ચ ઈન્સ્ટિટ્યુટમાં નોંધાયેલા નવેમ્બર ૨૦૨૫ સુધીમાં પુરુષોમાં મોઢાના કેન્સરના ૧૯૩૧, જ્યારે જીભના કેન્સરના ૯૯૯, ફેફસાના ૮૮૩, પેઢાનું કેન્સર ૪૪૩, અન્નનળીના કેન્સર ૩૭૫ અને અન્ય કેન્સરના ૫૪૬૫ કેસ નોંધાયા છે.
