SIR (એસઆઈઆર) માં 74.74 લાખ મતદારો ઘટયા છતાંય સ્થાનિક સ્વરાજ્યની સંસ્થાઓની ચૂંટણીમાં વર્ષ 2021ની ચૂંટણીના સાપેક્ષમાં ઊંચું વોટિંગ થયું છે. વર્ષ 2021માં કોવિડ-19 ના નિયંત્રણો વચ્ચે મ્યુનિસિપલ કોર્પોરેશનમાં 46.08 ટકા મતદાન નોંધાયું હતું. રવિવારે 44 ડિગ્રી ગરમી વચ્ચે મહાનગરોમાં 50 ટકાથી વધુ મત પડયા છે. જોકે, ગ્રામીણ ક્ષેત્રે જિલ્લા-તાલુકા પંચાયત ચૂંટણીમાં 62-63 ટકા આસપાસ મતદાન થયું છે. ફેબ્રુઆરી-2021ની ચૂંટણીમાં પંચાયતોમાં 66.68 ટકા મત પડયા હતા. 27 ટકા ઓબીસી અનામત, 9 નવા મ્યુનિસિપલ કોર્પોરેશન, એક નવો જિલ્લો અને 17 નવા તાલુકાઓને કારણે નવા સીમાંકનો-રોટેશનો વચ્ચે યોજાયેલી આ પહેલી ચૂંટણીમાં નોંધાયેલું બમ્પર વોટિંગ વર્ષ 2027 ને અંતે યોજનારી વિધાનસભા ચૂંટણીમાં કયા રાજકીય પક્ષના મૂળિયા કેટલા ઊંડા કરશે તેનું ભવિષ્ય નક્કી કરશે, જે મંગળવારે થનારી મતગણતરીમાં સ્પષ્ટ થશે.
રવિવારે મતદાન દરમિયાન શહેરી સંસ્થા-પાલિકાઓમાં એક વોર્ડમાં રાજકીય પાર્ટીની પેનલો અર્થાત ચાર ઉમેદવારોમાં મોટાપાયે ક્રોસવોટિંગ થયાની બૂમો ઉઠી હતી. ઈવીએમમાં પડેલા મતો મંગળવારે કંટ્રોલ યુનિટ-CU (સીયુ)માંથી કુલ સરવાળો જાહેર થશે ત્યારે એક પક્ષના 4 ઉમેદવારોની પેનલો તૂટે તો નવાઈ નહીં. રિઝર્વેશનને કારણે શહેરી સંસ્થાઓમાં બેઠક ફાળવણી-રોટેશનમાં બદલાવ થતા વોર્ડમાં અનામત વર્ગના ઉમેદવારોને સૌથી વધારે મત મળશે તો પણ તે સામાન્ય બેઠક પર વિજેતા જાહેર થઈ શકશે નહીં. અલબત્ત, કેટલીક પાલિકામાં 1 વોર્ડમાં 4 બેઠકોમાંથી બે સામાન્ય બેઠકો હોય ત્યાં એક સામાન્ય બેઠક પહેલાથી જ બિનહરીફ જાહેર થતા મંગળવારે યોજનારી મતગણતરી તબક્કે કયા નિયમો હેઠળ પરિણામો-વિજેતાની જાહેરાત કરવી તે અંગે રાજ્ય ચૂંટણી આયોગે ગણતરીકારોને માર્ગદર્શન પૂરું પાડયું હતું. આ ચૂંટણીમાં મતદાન પહેલા જ 10,005 બેઠકો પૈકી 736 બેઠકો પર ઉમેદવારો બિનહરીફ જાહેર થયા હતા. રવિવારે મતદાન હેઠળની 9,262 બેઠકો સામે 25,537 ઉમેદવારો ચૂંટણીના મેદાને હતા.-
