ગાંધીનગર જિલ્લાની પાંચેય વિધાનસભા મતદાન વિભાગની ફોટોવાળી મુસદ્દા મતદારયાદી પ્રસિદ્ધિ કરવામાં આવી છે. મતદારયાદી ખાસ સઘન સુધારણા કાર્યક્રમ અંતર્ગત ગાંધીનગર જિલ્લામાં સમાવિષ્ટ દહેગામ, ગાંધીનગર દક્ષિણ, ગાંધીનગર ઉત્તર, માણસા તથા કલોલ વિધાનસભા મતદાર વિભાગના તમામ મતદારોના ગણતરી ફોર્મ (EF) ભરવાની કામગીરી કરાઈ હતી.
જે અંતર્ગત જિલ્લાના કુલ 13,89,712 મતદારોમાંથી 2,15,786 મતદારોના નામ મતદાર યાદીમાંથી કમી થઈ ગયા છે. જ્યારે 11,73,926 મતદારોનો સમાવેશ મુસદ્દા મતદાર યાદીમાંથી થયો છે. જેમાં 6,05,622 પુરૂષ મતદારો, 5,68,259 સ્ત્રી મતદારો તથા 45 અન્ય મતદારોના સમાવેશ થાય છે. સવા બે લાખ મતદારોની બાદબાકી થઈ ગઈ છે, જે પૈકી સવા લાખ જેટલા મતદારો સ્થળાંતરિત થઈ ગયા હોવાનું ચિત્ર બહાર આવ્યું છે. આ જોતાં જિલ્લાની પાંચ વિધાનસભાની બેઠકો પર રાજકીય હારજીતની સ્થિતિનું ચિત્ર બદલાશે તેવી પણ એક ચર્ચા છે. આ તફાવત ભાજપ અને કોંગ્રેસમાંથી કોને ભારી પડશે તેને લઈને પણ લોકોમાં ચર્ચા ઉઠી છે. કોંગ્રેસની મુંઝવણ વધશે, ભાજપએ પણ આ ફેરફારને હળવાશમાં નહી લઈ શકાય.
