ગિફ્ટ સિટી (GIFT City)ના વિકાસ મુદ્દે ગાંધીનગરમાં ઉચ્ચસ્તરીય સમીક્ષા બેઠક યોજાઈ હતી. બેઠકમાં કેન્દ્રીય નાણામંત્રી નિર્મલા સીતારમણ હાજર રહ્યા હતા. સાથે જ પીએમઓના પ્રિન્સિપલ સેક્રેટરી પી. કે. મિશ્રા, રાજ્યના ઉપમુખ્યમંત્રી હર્ષ સંઘવી તેમજ રાજ્ય સરકારના વરિષ્ઠ અધિકારીઓ પણ ઉપસ્થિત રહ્યા હતા. બેઠકમાં ગિફ્ટ સિટીના ઝડપી વિકાસ અને તેની વૈશ્વિક સ્થિતિને વધુ મજબૂત બનાવવા અંગે વિસ્તૃત ચર્ચા કરવામાં આવી હતી.
ફાઇનાન્સ, બેન્કિંગ અને ફિનટેક ક્ષેત્ર પર ખાસ ભાર
બેઠક દરમિયાન ગિફ્ટ સિટીને વૈશ્વિક ફાઇનાન્સ હબ તરીકે વિકસાવવા માટેના વિવિધ મુદ્દાઓ પર ચર્ચા કરવામાં આવી હતી. ખાસ કરીને બેન્કિંગ અને ફિનટેક ક્ષેત્રના વિસ્તરણ પર ભાર મૂકવામાં આવ્યો હતો. સાથે જ આંતરરાષ્ટ્રીય નાણાકીય સેવાઓને આકર્ષવા માટેની નીતિઓ અને રોકાણ વધારવા માટેના પ્રયાસો અંગે પણ સમીક્ષા કરવામાં આવી હતી.