જંબુસર : આમોદ શહેર સહિત સમગ્ર તાલુકામાં દારૂબંધીનો કડક અમલ કરાવવા માટે તાલુકા કોંગ્રેસ દ્વારા પોલીસને આવેદનપત્ર આપવામાં આવ્યું હતું. ભરૂચ જિલ્લા કોંગ્રેસ પ્રમુખ રાજેન્દ્રસિંહ રાણાની આગેવાની હેઠળ કોંગ્રેસના આગેવાનો અને કાર્યકરોએ રેલી યોજી મામલતદાર કચેરી ખાતે પહોંચી પોલીસ ઇન્સ્પેક્ટર રાજેન્દ્ર કરમટિયાને આવેદનપત્ર સુપરત કર્યું હતું. કોંગ્રેસે આક્ષેપ કર્યો હતો કે આમોદ નગર તેમજ તાલુકાના વિવિધ વિસ્તારોમાં દેશી અને વિદેશી દારૂનું વેચાણ થઈ રહ્યું છે અને દારૂના અડ્ડાઓ સામે કડક કાર્યવાહી કરવાની જરૂર છે.