ગલ્ફ દેશોમાં ચાલી રહેલી યુદ્ધ જેવી પરિસ્થિતિની અસર હવે જામનગરના પ્રખ્યાત બ્રાસ ઉદ્યોગ પર પણ જોવા મળી રહી છે.છેલ્લા કેટલાક દિવસોથી કોમર્શિયલ LPG ગેસના બાટલાની અછત સર્જાતા અનેક નાના અને મધ્યમ ઉદ્યોગ એકમોમાં ઉત્પાદન પ્રક્રિયા ધીમી પડી ગઈ છે. જ્યારે કેટલાક એકમોને કામકાજ તાત્કાલિક બંધ કરવાની ફરજ પડી છે.જામનગરનો બ્રાસ ઉદ્યોગ મુખ્યત્વે આયાત નિકાસ પર આધારિત છે.
બ્રાસ ઉદ્યોગના અંદાજે 9000થી વધુ એકમો કાર્યરત
બ્રાસના વિવિધ ભાગો અને ઉત્પાદનો બનાવવા માટે LPG ગેસ મહત્વપૂર્ણ ઉર્જા સ્ત્રોત હોવાથી તેની અછત સીધી રીતે ઉત્પાદન પર અસર કરી રહી છે. ખાસ કરીને નાના ઉદ્યોગકારોને સૌથી વધુ મુશ્કેલીનો સામનો કરવો પડી રહ્યો છે.ગેસના બાટલા સમયસર ન મળતા અનેક મશીનો બંધ પડી ગયા છે અને ઉત્પાદન પ્રક્રિયા અટકી ગઈ છે.જેના કારણે કારખાનાઓમાં કામ કરતા મજૂરોના રોજગાર પર પણ અનિશ્ચિતતા ઉભી થઈ છે.જામનગરમાં બ્રાસ ઉદ્યોગના અંદાજે 9000થી વધુ એકમો કાર્યરત છે. તેમાંથી આશરે 3500 જેટલા એકમો ગેસની અછતને કારણે સીધા પ્રભાવિત થયા હોવાનું ઉદ્યોગકારો જણાવી રહ્યા છે.
