જામનગર જિલ્લા પોલીસ દળમાં ફરજ બજાવતા પોલીસ ઇન્સ્પેક્ટર (PI) વાય.જે. વાઘેલાને ફરજમાં બેદરકારી દાખવવા બદલ તાત્કાલિક અસરથી સસ્પેન્ડ કરવામાં આવ્યા છે. ધ્રોલ પોલીસ સ્ટેશનમાં નોંધાયેલા એક સંવેદનશીલ દુષ્કર્મ કેસની તપાસમાં ગંભીર નિષ્કાળજી સામે આવતા જિલ્લા પોલીસ વડાએ આ કડક આદેશ આપ્યો છે.
તપાસમાં ગંભીર ચૂક અને બેદરકારી
મળતી માહિતી મુજબ, ધ્રોલ તાલુકાના એક ગામમાં થોડા સમય પહેલા દુષ્કર્મની ગંભીર ઘટના બની હતી. આ કેસની તપાસ PI વાય.જે. વાઘેલાને સોંપવામાં આવી હતી. જોકે, આવા સંવેદનશીલ ગુનામાં જે પ્રકારની ગંભીરતા અને ત્વરિત કાર્યવાહી અપેક્ષિત હતી, તેમાં PI વાઘેલા ઉણા ઉતર્યા હોવાનું જણાયું હતું. તપાસમાં રહેલી ક્ષતિઓ અને બિનજવાબદાર વલણને ધ્યાને રાખીને જામનગર SP ડો. રવિ મોહન સૈનીએ આ શિક્ષાત્મક પગલું ભર્યું છે.
