સાબરકાંઠા જિલ્લાના પોશીના પંથકમાં કુદરત પ્રકોપ બનીને વરસી છે. ગઈકાલે મોડી રાત્રે પડેલા અનરાધાર વરસાદ અને ઉપરવાસમાં થયેલા સતત ભારે વરસાદને કારણે આજે વહેલી સવારે પોશીના-દેલવાડા મુખ્ય માર્ગ પર પૂર જેવા દ્રશ્યો સર્જાયા હતા. આ મુખ્ય રસ્તા ઉપર ઘૂંટણસમા પાણી ફરી વળ્યા હતા, જેને પગલે વહેલી સવારથી જ દેલવાડા તરફ જતો સ્થાનિક વાહનવ્યવહાર સંપૂર્ણપણે ખોરવાઈ ગયો હતો. રસ્તા પર પાણીનો પ્રવાહ એટલો તેજ હતો કે નાના વાહનો પલટી ખાય તેવી સ્થિતિ ઊભી થતાં વાહનચાલકો ભારે મુશ્કેલીમાં મુકાયા હતા અને કલાકો સુધી ટ્રાફિક જામની સ્થિતિ સર્જાઈ હતી.
ઉપરવાસના વિસ્તારોમાં અતિભારે વરસાદ
સ્થાનિક સૂત્રોના જણાવ્યા અનુસાર, ઉપરવાસના વિસ્તારોમાં થયેલા અતિભારે વરસાદનું પાણી નીચાણવાળા વિસ્તારો તરફ ધસી આવ્યું હતું. પાણીની જોરદાર અને અવિરત આવક થવાના કારણે માર્ગ પર આવેલા તમામ નાળા અને કોઝવે ઓવરફ્લો થઈ ગયા હતા. રસ્તાઓ પરથી પાણી જાણે નદીની જેમ વહેતું હોય તેવા રોમાંચક અને સાથે જ ભયાનક દ્રશ્યો કેમેરામાં કેદ થયા હતા.
