આજે ખેડા જિલ્લા સહકારી દૂધ ઉત્પાદક સંઘના ચેરમેન અને વાઈસ ચેરમેનની ચૂંટણી યોજાશે. અમૂલ ડેરીની સત્તા કોના હાથમાં આવશે તે બાબતે ખેડૂતોમાં ભારે ઉત્તેજના છે. ડેરીનું ચેરમેન પદ ક્ષત્રિયને ફાળવવામાં આવે તેવી ચર્ચાઓ શરૂ થઈ છે. સામાન્ય ચૂંટણીના 96 દિવસ બાદ આજે બપોરે બાર વાગ્યાની આસપાસ અમૂલ ડેરીના ચેરમેન અને વાઈસ ચેરમેન માટેની ચૂંટણી યોજાશે.
બન્ને પદ ઉપર સર્વાનુમતે વરણી કરાશે
ખેડા જિલ્લા સહકારી દૂધ ઉત્પાદક સંઘ- અમૂલ ડેરીના ચેરમેન અને વાઈસ ચેરમેનની આજે ડેરીના મુખ્યાલયે બપોરે 12 વાગ્યે ચૂંટણી પ્રક્રિયા યોજાશે. જો કે પ્રદેશ મોવડી દ્વારા બન્ને મહત્વના પદ માટે મેન્ડેટ ફાળવીને પ્રક્રિયા આટોપવામાં આવશે. 17 ડેરી સંઘના સભ્યો પૈકી 15 સભ્યો સાથે ભાજપની સ્પષ્ટ બહુમતિ હોય ચૂંટણી પ્રક્રિયા માત્ર ઔપચારિક બની રહેશે. ચેરમેન અને વાઈસ ચેરમેન બન્ને પદ ઉપર સર્વાનુમતે વરણી કરાશે. હાલમાં સત્તારૂઢ ચેરમેન અને વાઈસ ચેરમેનના સ્થાને નવા ચહેરાને સ્થાન આપવામાં આવે તેવી પ્રબળ શક્યતાઓ સહકારી ક્ષેત્રના રાજકારણમાં ચર્ચામાં છે.
