કચ્છના વેપાર અને ઉદ્યોગ જગત માટે આજે એક ખૂબ જ દુઃખદ સમાચાર સામે આવ્યા છે. કચ્છ ચેમ્બર ઓફ કોમર્સ એન્ડ ઇન્ડસ્ટ્રીઝના પ્રમુખ રાજેશ ભટ્ટનું આજે સવારે અમદાવાદ ખાતે હાર્ટ એટેક આવવાના કારણે દુઃખદ અવસાન થયું છે. આ સમાચાર વાયુવેગે પ્રસરતા જ સમગ્ર કચ્છ સહિત રાજ્યના ઉદ્યોગ જગતમાં ઘેરા શોકની લાગણી વ્યાપી ગઈ છે.
ઉદ્યોગ જગતને મોટી ખોટ
રાજેશ ભટ્ટ લાંબા સમયથી કચ્છના નાના-મોટા ઉદ્યોગકારો અને વેપારીઓના અધિકારો માટે લડતા આવ્યા હતા. કચ્છના ઔદ્યોગિક વિકાસ અને સ્થાનિક વેપારના પ્રશ્નોને સરકાર સમક્ષ રજૂ કરવા માટે તેઓ હંમેશા અગ્રેસર અને સક્રિય રહેતા હતા. ઉદ્યોગ જગતના કોઈ પણ જટિલ પ્રશ્નોના નિકાલ માટે તેમની ભૂમિકા ખૂબ જ મહત્વપૂર્ણ ગણાતી હતી. તેમના નિધનથી કચ્છ ઉદ્યોગજગતને મોટી ખોટ પડશે.
