કચ્છના દરિયાકાંઠાના વિસ્તારમાં ફૂંકાયેલા તેજ પવનોને કારણે કંડલામાં એક મોટી દુર્ઘટના સર્જાઈ છે. કંડલા વિસ્તારમાં આવેલો એક વિશાળ મોબાઈલ ટાવર પત્તાની માફક ધરાશાયી થયો હતો. ભારે પવનના વેગને કારણે ટાવરનું લોખંડી માળખું નમી પડ્યું હતું અને જોતજોતામાં જમીનદોસ્ત થઈ ગયું હતું. આ ઘટનાને પગલે આસપાસના વિસ્તારમાં ભારે અફરાતફરી મચી ગઈ હતી.
ટાવર પડતાની સાથે જ થયો બ્લાસ્ટ
આ ઘટનાની સૌથી ભયાનક બાબત એ હતી કે, જેવો જ મોબાઈલ ટાવર જમીન પર પટકાયો, તેની સાથે જ એક મોટો બ્લાસ્ટ (ધડાકો) થયો હતો. ટાવર પર રહેલા ઇલેક્ટ્રિકલ વાયરિંગ અથવા હાઈ-વોલ્ટેજ ઉપકરણોમાં શોર્ટ સર્કિટ થવાને કારણે આ બ્લાસ્ટ થયો હોવાની આશંકા છે. ધડાકાના અવાજથી સ્થાનિક લોકો ભયભીત થઈ ઘરની બહાર દોડી આવ્યા હતા. સદનસીબે, ટાવર જ્યારે પડ્યો ત્યારે નીચે કોઈ વ્યક્તિ કે વાહન ન હોવાથી મોટી જાનહાનિ ટળી હોવાનું પ્રાથમિક દ્રષ્ટિએ જણાય છે.