છેલ્લા ઘણા સમયથી ભાવનગર જિલ્લાના વલ્લભીપુર પંથકમાં ફફડાટ ફેલાવનાર દીપડો આખરે વનવિભાગની જાળમાં ફસાઈ ગયો છે. વલ્લભીપુર તાલુકાના ગ્રામ્ય વિસ્તારોમાં રાત્રિના સમયે ધમાલ મચાવતો આ દીપડો આજે વહેલી સવારે પાંજરે પુરાતા સ્થાનિક ખેડૂતો અને ગ્રામજનોમાં ખુશીનો માહોલ જોવા મળી રહ્યો છે.
ઉમરાળા અને વાવડી વચ્ચે પકડાયો દીપડો
પ્રાપ્ત વિગતો અનુસાર, વલ્લભીપુર તાલુકાના ઉમરાળાથી વાવડી હળિયાદ વચ્ચેના વાડી વિસ્તારમાં દીપડાની અવરજવર ખૂબ વધી ગઈ હતી. દીપડાએ અનેક પશુઓનું મારણ કર્યું હોવાની ફરિયાદો ઉઠતા વનવિભાગ હરકતમાં આવ્યું હતું. રેન્જ ફોરેસ્ટ ઓફિસર (RFO) કિશોરસિંહ બારડના નેતૃત્વ હેઠળ વનવિભાગની ટીમે આ વ્યૂહાત્મક સ્થળે પાંજરું ગોઠવ્યું હતું. આજે વહેલી સવારે મારણની લાલચે દીપડો પાંજરામાં કેદ થઈ ગયો હતો.
ચાર ગામના ગ્રામજનો ભયમુક્ત
વલ્લભીપુર પંથકના ઉમરાળા, વાવડી અને હળિયાદ સહિતના આસપાસના ચાર ગામોમાં છેલ્લા કેટલાક મહિનાઓથી ભારે દહેશત હતી. વન્ય પ્રાણીઓની અવરજવર વધતા ખેડૂતો રાત્રિના સમયે ખેતરે પાણી વાળવા જતાં પણ ડરતા હતા. દીપડાના આતંકને કારણે જનજીવન પ્રભાવિત થયું હતું, પરંતુ હવે દીપડો પકડાતા ગ્રામજનોએ મહિનાઓ બાદ રાહતનો શ્વાસ લીધો છે.
વનવિભાગની સફળ કામગીરી
ઉલ્લેખનીય છે કે, વલ્લભીપુર પંથકમાં છેલ્લા કેટલાક સમયથી જંગલી જાનવરોનો વસવાટ વધ્યો છે. વનવિભાગ દ્વારા સતત મોનિટરિંગ કરવામાં આવતું હતું. RFO કિશોરસિંહ બારડ અને તેમની ટીમે સમયસૂચકતા વાપરી દીપડાને પાંજરે પૂરી કોઈ મોટી જાનહાની થતી અટકાવી છે. વનવિભાગ દ્વારા હવે આ દીપડાને સુરક્ષિત રીતે એનિમલ કેર સેન્ટર ખાતે ખસેડવાની તજવીજ હાથ ધરવામાં આવી છે.
આ પણ વાંચો: મૂકબધિર યુવતીને બ્લેકમેઇલ કરી 7.70 લાખ પડાવનાર બે આરોપીઓ ઝડપાયા
